अफ्रिकी नागरिक दुमकाइगु

येँ- कोरोना भाइरसया न्हूगु भेरिएन्ट ओमिक्रोनं संक्रमित जूपिं थीथी देशय् अप्वया वनेवं नेपालं अफ्रिकी नागरिकयात मेगु व्यवस्था मजूतले नेपाः दुमकाइगु जूगु दु । गृह मन्त्रालयं अध्यागमन विभाग, त्रिभुवन विमानस्थल कार्यालय व सीमा क्षेत्रया प्रशासन कार्यालययात अफ्रिकी नागरिकपिंत दुमकायेत निर्देशन बिउगु दु ।

गृह मन्त्रालयया निर्णय कार्यान्वयनया नितिं अध्यागमन विभागं नं थः मातहतया अध्यागमन ज्याकूयात पौ च्वयाः जानकारी बीधुंकूगु दु । उकथं हे अफ्रिकी देय् जुयाः यात्रा याःपिं मेगु देय्या नागरिकयात नं कोरोना परीक्षणया रिपोर्ट व औचित्यया आधारय् जक आवश्यक निर्णय कायेत निर्देशन बिउगु दु ।

थ्वहे झ्वलय् वंगु छुं न्हिं न्ह्यः जक अफ्रिकी मुलुक जुयाः छुं छुं मनूत नेपाः वःगु खँ सीदुगु दु । तर उकिया बारे विस्तृत जानकारी धाःसा मवःनिगु खँ अध्यागमन विभागं धाःगु दु ।