स्वनिगःयात सांस्कृतिक नगर दयेकेत न्याम्हं मेयर छथाय्

ख्वप – स्वनिगःया साँस्कृतिक धरोहरयात बचे याना तयेगु निंतिं ख्वपय् स्वनिगःया न्यागुलिं नगरपालिकाया मेयरपिं छथाय् हे च्वनाः प्यंगू निर्णयय् याःगु दु । ख्वप नगरपालिकाया मेयर सुनिल प्रजापति, येँ महानगरपालिकाया मेयर विद्यासुन्दर शाक्य, यल महानगरपालिकाया मेयर चिरिबाबु महर्जन, किपू नगरपालिकाया मेयर रमेश महर्जन व मध्यपुर थिमि नगरपालिकाया मेयर मदनसुन्दर श्रेष्ठं स्वनिगःयात सांस्कृतिक नगर घोषणा याकेगु निंतिं थ्व पहल याःगु खः ।

ख्वप नगरपालिकाया सभाकक्षय् च्वंगु बैठकं स्वनिगःया ऐतिहासिक व पुरातात्विक महत्व दुगु संरचनाया पुनर्निर्माण यायेगु, पुनर्निर्माण फुक्कं परम्परागत मौलिक शैलीं यायेगु, स्वनिगःयात सांस्कृतिक संरक्षित लागा घोषणा याकेत फुक्कं नगरपालिकां थःथःगु थासं ग्वाहालि यायेगु नापनापं स्वनिगःया ऐतिहासिक नगरपालिकाया दथुइ अन्तरनगर सांस्कृतिक आदान प्रदान याना वनेगु खँ क्वछिउगु खः । उगु बैठक लिपा नगर प्रमुखपिंसं ख्वपया टौमढी लागा, ख्वप कलेज, ख्वप बहुप्राविधिक अध्ययन संस्थान व ख्वप इन्जिनियरिङ कलेजया नं स्थलगत अवलोकन याःगु खः ।