विधेयक पारित जूसां डा. केसीया अनसन जारी आः झन् स्थिति तनावपूर्ण

येँ – सदनय् थानाच्वंगु विवादास्पद चिकित्सा शिक्षा विधेयक शुक्रवाः सरकारं जबर्जस्ती पारित याःसां उकिया विरुद्ध आमरण अनसन च्वनाच्वंम्ह डा. गोविन्द केसीं धाःसा थःगु अनसन मत्वःतेगु खँ धयादीगु दु । वय्कलं अन्तिम इलय् तकं अनसन मत्वःतेगु खँ धयादीगु कारणं आः थ्व विधेयक छु जुइ धइगु विषयय् थीथी खँ पिहां वःगु दु ।

डा. केसीयात ‘बाइपास’ यानाः विधेयक पारित याःगुलिं नेपाल चिकित्सक संघं डा. केसीया समर्थनय् हडताल यायेगु निर्णय यायेधुंकूगु दु । आः चिकित्सक संघं इमर्जेन्सी बाहेक मेगु सेवा ठप्प यायेगु ख्याच्वः बीधुंकूगु दु । लिसं उमिसं सरकारयात डा. केसीलिसे वार्ता यानाः वय्कःया खँ समेत दुथ्याकाः विधेयक संशोधन यायेत नं इनाप याःगु दु ।

उखे डा. केसीया समर्थकतय्सं प्रतिनिधिसभां पारित याःगु थ्व विधेयकयात आः राष्ट्रिय सभाय् पने माःगु बिचाः नं न्ह्यःने हःगु दु । प्रतिनिधिसभां जबर्जस्ती पारित याना हःगु थ्व विधेयकयात राष्ट्रियसभां पनाः डा. केसीया माग कथं संशोधन यानाः जक कार्यान्वयन यायेगु कथंया ज्या जुइ माःगु सुझाव बिउगु दु ।

उमिसं धाःगु दु, थ्व विधेयकयात आः थप संशोधन यानाः जक पारित या धकाः राष्ट्रियसभां लित छ्वया बीमाः । संसदीय व्यवस्था कथं राष्ट्रियसभां संशोधन यानाः छ्वया हजि धकाः लित छ्वःगु विधेयकयात प्रतिनिधिसभां आवश्यक जुल धाःसा संशोधन यायेफु । मखुसा राष्ट्रियसभाया सुझावयात अस्वीकार याःसां अथे यायेगु अधिकार प्रतिनिधिसभायाके दु ।

डा. केसीं सरकारं विधेयक पारित याःसां अनसन धाःसा मत्वःतेगु अडान कयादीगुलिं आः स्थिति अझ तनावपूर्ण जू वनीगु खतरा पिहां वःगु खँ चिकित्सकतय्सं धाःगु दु । डा. केसीया स्वास्थ्यस्थिति स्यना वन धाःसा चिकित्सा ख्यःलिसे सम्बन्धित मेमेगु विधाया व्यवसायीत नं आन्दोलनय् कुहां वइगु सम्भावना दु ।

उकिं सरकारं विधेयक पारित हे यायेधुंकूगु दुसां नं उकी लिपा हानं संशोधन यायेगु बचं बियाः डा. केसीया अनसन त्वाःथलेमाःगु सुझाव उमिसं बिया हःगु दु । तर सरकारं धाःसा आः डा. केसीलिसे वार्ता यायेगु वा मयायेगु धइगु बारे छुं खँ धाःगु मदुनि ।

प्रधानमन्त्री केपी ओली म्हिगः स्वीट्जरल्याण्डं लिहां झाःगु दुसा आः वय्कलं हे थुकिया बारे निर्णय यानादीगु खँ धाःगु दु । चिकित्सा शिक्षा विधेयक सदनं जबर्जस्ती पारित याःगु विषययात नागरिक समाजं धाःसा नागरिक अधिकारया हनन् खः धासें सरकारया कडा आलोचना याना हःगु दु ।

 

 

 

सम्बन्धित बुखँ

LEAVE YOUR COMMENTS