येँय् छु पार्टीया सुनां गुलि भोट काल ?

येँ (नेपालभाषा टाइम्स)- येँया निर्वाचन क्षेत्र नम्बर ६ लय् नं रवि लामिछानेया न्हूगु दल राष्ट्रिय स्वतन्त्र पार्टीया शिशिर खनाल त्याःगु दु । खनालं १४ हजार २०४ मत हःगु खःसा वय्कःया प्रतिद्वन्द्वी एमालेया सर्वेन्द्र खनाल ८ हजार ९११ मत हःगु खः । नेपाली कांग्रेसया भिमसेनदास प्रधानं ८ हजार ५०० मत हःगु दु ।

उकथं हे येँ–१० य् राजन केसी त्याःगु दु । केसीं १४ हजार ४५८ मत हःगु खःसा वय्कःया प्रतिद्वन्द्वी एमालेया हिमेश केसीं ११ हजार ७८७ मत हःगु खः । येँ क्षेत्र ७ य् नं रास्वपाया गणेश पराजुली त्याःगु दु । पराजुलीं ८ हजार ७४३ मत ःगु खःसा वय्कःया प्रतिद्वन्द्वी एमालेया श्याम घिमिरें ६ हजार ८०० व गठबन्धनया मानुषी यमि भट्टराईं ६ हजार ६३ मत हःगु खः ।

येँ क्षेत्र २ लय् रास्वपाया सोविता गौतम त्याःगु दु । वय्कलं १५ हजार २२९ मत हःगु खःसा वय्कःया प्रतिद्वन्द्वी एमालेया मणिराम फुँयाल ११ हजार ५५५ मत हःगु खः ।
यलया क्षेत्र १ य् कांग्रेसया उदयशम्शेर राणा त्याःगु दु । राणां एमालेया नवराज सिलवालयात ४ हजार ६१४ मतं बुकूगु खः । राणां २३ हजार ८९२ मत हःगु खःसा सिलवालं १९ हजार २७८ मत हःगु खः ।

थ्वहे झ्वलय् स्वनिगःया थीथी क्षेत्रया प्रदेशसभाया दुजःपिं नं निर्वाचित जूगु दु । येँ क्षेत्र २ या निगुलिं प्रदेशसभा दुजलय् राप्रपा त्याःगु दु । क्षेत्र नम्बर २ (ख) लय् राप्रपाया राजु बिष्ट त्याःगु दुसा वय्कलं प्रतिद्वन्द्वी एमालेया सुवर्ण श्रेष्ठयात बुकादीगु खः । अथे हे २ (क) लय् राप्रपाया सुनिल केसी विजयी जुयादीगु दु ।

येँया क्षेत्र ३ (क) लय् नेपाली कांग्रेसया श्रीराम लामिछाने त्याःगु दु । अनया ३ (ख) लय् एमालेया जयराम थापा निर्वाचित जुयादीगु दु । अथे हे येँया ७ नम्बर निर्वाचन क्षेत्र (क) स नेकपा एकीकृत समाजवादीया बसन्तप्रसाद मानन्धर विजयी जुयादीगु दु । वय्कलं ४ हजार १५३ मत हयादीगु खःसा उगु हे क्षेत्रया (ख) लय् एमालेया प्रकाश
श्रेष्ठ विजयी जुयादीगु दु । वय्कलं ५ हजार २१८ मत हयादीगु खः । येँया ६ (ख) लय् अमनकुमार मास्के त्याःगु दु ।

येँ ९ (ख) य् एमालेया केशवप्रसाद पोखरेल त्याःगु दुसा ९ (क) य् राप्रपाया नुपुर वज्राचार्य त्याःगु दु । ख्वपया निर्वाचन क्षेत्र नं. १ प्रदेश (क) लय नेपाली कांग्रेसया सुरेश श्रेष्ठ त्याःगु दु । वय्कलं ९ हजार ४२४ मत हयादीगु खः । उकथं हे यलया १ नम्बर क्षेत्रया (ख) लय् नेपाली कांग्रेसया मीनकृष्ण श्रेष्ठ विजयी जुयादीगु दु । वयक्लं १३ हजार ३७८ मत हयादीगु खः । मेमेगु क्षेत्रय् मत गणना जारी हे जुयाच्वंगु दनि ।