ओली पक्षीय जनजाति भेलाय् जीतवीर लामा नं प्रवेश

येँ – आदिवासी जनजाति आन्दोलनया न्ह्यलुवा जितवीर लामा प्रधानमन्त्री केपी ओली पुचःया नेकपाय् प्रवेश जुयादीगु दु । ओली पुचःलिसे आवद्ध आदिवासी जनजाति महासंघ नेपालया म्हिगः जूगु राष्ट्रिय भेलाय् भाजु लामा लिसें राजनीतिकर्मी कमानसिंह लामा नं नेकपाय् दुहां वंगु खः ।

ज्याझ्वःयात सम्बोधन यासें प्रधानमन्त्री ओलीं आः देशय् जातीय खँ ल्ह्वनाः राजनीति याइपिनि जमाना समाप्त जूगु खँ कनादिल । वय्कलं पार्टी विभाजन धाःसां पार्टीया आधिकारिकता थःके हे दनि धासें छुं दशा लगे जूपिं मनूत जक थःगु पार्टी त्वःताः मेगु गुटय् वंगु द्वपं बियादिल । तत्कालीन एमालेया चुनाव चिं सुद्र्यः थम्हं हे ल्ययागु खः धासें वय्कलं सुद्र्यः चिं कयाः गबलें हे चुनाव मल्वाःपिं मनूत नं थौं सुद्र्यः चिंया दावी याः वयाच्वंगु दु धयादिल ।

उगु हे ज्याझ्वलय् गृहमन्त्री रामबहादुर थापां आः वैशाखं जुइगु चुनावय् थःपिनि पार्टीं दुई तिहाइ बहुमत हयाः विकास निर्माणया ज्यायात तीव्र ढंगं न्ह्यःने न्ह्याकेगु बिचाः तयादीगु खः ।