टप स्टारतय् फ्लप मस्त

बलिउडय् स्टार किड्स धाल कि न्ह्याब्लें बय्बय् जू । उकि मध्ये लिपांगु इलय् तसकं हे बय्बय् जूपिं धइपिं श्रीदेबीया म्ह्या्य जानव्ही कपूर व सनी देओलया काय् करन देओल खः । उपिं मध्ये जानव्ही कपूरया डेब्यू फिल्म “धडक” छुं भतिचा लोकंह्वातसा मेगु फिल्म “गुन्जन सक्सेना” धाःसा कोरोना संक्रमणया जोखिमया कारणं हलय् मखसे ओटिटि डिजिटल प्लेटफर्मय् रिलिज यायेमाल । आः वयागु पलाः गथे जुइ धइगु स्वये ल्यंदनि । स्टार किड्सया रुपय् बय्बय् जूपिं श्रद्धा कपुर व टाइगर श्राफ नं खः ।

श्रद्धा कपुर छगू जमानाया नांजाःम्ह भिलेन शक्ति कपुरया म्ह्याय् खः । टाइगर श्राफ ज्याकि श्राफया काय खः । टाइगरया डेब्यु फिल्म “हिरोपन्ती” हिट जुल । श्रद्धाया डेब्यु फिल्म “आशिकी २” नं हिट जुल । व धुंकाः “एक भिलेन” नं हिट जुल । डेब्यु फिल्म हिट जूगुलिं श्रद्धा व टाइगरया पलाः थौंकन्हय् बँय् तये मलाः । थौं उपिं गाक्क डिमाण्डय् दु । कन्हय् छु जुइ सुनां धायेफु ।

छगू जमानाय् जुब्ली कुमार धकाः बय्बय् यानातःम्ह राजेन्द्र कुमारया काय कुमार गौरबया डेब्यु फिल्म “लभ स्टोरी” हिट जक मखु सुपर हिट जूबलय् वयात अबायति बलिउडया न्हूम्ह सुपरस्टार धकाः बय्बय् यात । उगु इलय् सुपर स्टार धकाः धयातःम्ह राजेश खन्नाया फिल्मं स्वकुमिया नुगः त्याके मफयाच्वंगु खःसा अभिताभ बच्चन स्टारया रुपय् बय्बय् जुयाच्वंगु खः ।

अज्याःगु इलय् बलिउडया सर्गतय् लुयावःम्ह कुमार गौरवयात छथ्वसिनं न्हूम्ह सुपर स्टार धकाः बय्बय् यात । अले राजेश खन्ना, ऋषि कपुर थेंज्याःपिं रोमान्टिक हिरोतय् थाय् काइम्ह धकाः धाल । तर अथे जुइ मफुत । “लभ स्टोरी” धुंकाः पिदंगु कुमार गौरवया दक्व धइथें फिल्म फ्लप जुयाबिल । अले कुमार गौरव नं बलिउडं तना वन । बलिउडय् अथे यक्व हे जू । छगू जमानाय् टप स्टार धकाः न्हाय् धस्वाकूपिनि मस्त थः टप पोजिशनय् थ्यंके मफुगु यक्व दसु दु ।

बलिउडया न्हापांम्ह सुपरस्टार राजेश खन्नाया तिरीमय्जु डिम्पल कपाडिया नं छम्ह स्टार हे खः । तर उमि मस्त धाःसा बलिउडय् स्टार जुइ मफुत । उमि तःधिकःम्ह म्ह्याय् ट्वींकल खन्नां शाहरुख खानलिसे “बादशाह” आमिर खानलिसे “मेला” व सलमान खानलिसे “जब प्यार किसि से होता है” म्हितल । थ्व स्वंगू मध्ये “जब प्यार किसि से होता है” छगू जक हिट जुल । तर ट्वींकल धाःसा बलिउडय् फिट मजुल । ट्वींकलया केहेँ रिंकी खन्नां नं “प्यार मे कभी कभी” व “जिस देश मे गंगा रहती है” थेंज्याःगु फिल्म ला म्हितल । तर वयागु हविगत ला तताम्हेसियां सिबें बांमलात ।

राजेश खन्नायात सुपर स्टारया सिंहासनं कुर्काः थः च्वनेत ताःलाःम्ह अभिताभ बच्चनं बलिउडय् सुनां हुइ मफइगु छाप त्वःतातःगु दु । अभिताभया तिरीमय्जु जया भाडुरी नं छम्ह ज्वःमदुम्ह स्टार हे खः । तर उमि काय् अभिषेक बच्चनं धाःसा अथे याये मफुत । खय्त ला अभिषेक बच्चनया गुरु, धुम, धुम २, धुम ३, बन्टी और बब्ली, सरकार, सरकार राज थेंज्याःगु फिल्म हिट जुल । थुगुने सुपर हिट फिल्म “ह्याप्पी न्यू इयर” य् अभिषेक बच्चन ला दु । तर थुकी मध्ये दक्व धइथें फिल्म हिट जूगुया क्रेडिट मेपिंसं हे यंकल ।

छगू जमानाय् धर्मेन्द्र व राजकुमार धालकि सर्पोटिंग रोलय् ज्यान तयेफुपिं धाइ । तर राजकुमारया काय् पुरु राजकुमारया बलिउड यात्रा सुथां लाये मफुत । धर्मेन्द्रया निम्ह काय् दु । छम्ह सनी देओल अले मेम्ह बबी देओल । बबी देओलया क्यारियर सुथां लाये मफुत । बरु सनी देओलं धाःसा बलिउडय् छगू इलय् थःगु न्हाय् धस्वाका क्यनेत ताःलाम्ह हिरो खः । सनी देओलया काय् करन देओल नं “पल पल दिल के पास” नांयागु छगू फिल्मपाखें बलिउडय् डेब्यू ला यात तर उगु फिल्म उलिं लोकं मह्वाबलय् वयागु पलाः नं दित ।

सनी व बबीया अबु धर्मेन्द्रया निम्हम्ह तिरीमय्जु हेमा मालिनी ला बलिउडय् ड्रिम गर्लया दर्जा बियातःम्ह हिरोइन खः । उपिं निम्हतिपुया म्ह्याय् इशा देओल नं बलिउडय् हिरोइन जूम्ह खः । “धुम” फिल्मय् टु पिस बिकिनी फिनाः म्हितूबलेय् अबु धर्मेन्द्रया ब्व नं फल । “धुम” हिट जूसां इशाया मेमेगु फिल्म हिट मजुबलय् वयागु बलिउड यात्रा नं दित ।

पुलांगु जमानाया स्टारतय् आपालं मस्तसेंं फिल्मय् थःगु पलाः न्ह्याकेगु कुतः यात । मनोज कुमारया काय् कुणाल गोस्वामिया दो गुलाब, कलाकार, रोटी कि किम्मत थेंज्याःगु छुं छुं फिल्म पिदन । फिरोज खानया काय् फरदिन खानयात वया हे अबुं “प्रेम अगन” नांयागु फिल्मय् हिरो दयेकल । फिरोज खानया किजा संजय खानया काय् जायद खानया “चुरा लिया है तुमने”, “मैं हुँ ना” निसें “शराफत गई तेल लेने” तकया फिल्म यात्राय् “मै हुँ ना” छगू त्वःताः मेगु छुं नं फिल्मया बनेज्या ताःलाये मफुत । “मै हुं ना” नं शाहरुख खानया हुनिं जक बनेज्या ताःलाःगु फिल्म खः । संजय खानया किजा फिरोज खान नं छगू इलय् थःगु बिस्कं कथंया थाय् दयेकूम्ह हिरो खः, तर वया काय फरदिन खानं अज्याःगु थाय् दयेके मफुत ।

जितेन्द्र धाल कि छगू जमानाय् तसकं लोकंह्वाम्ह हिरो खः । वया काय् तुषार कपुरं अबुया न्हाय् तये मफुत । तुषार कपुरजक मखु देव आनन्दया काय सुनिल आनन्दया नं हविगत अथे हे जुल । अथेला सुनिल आनन्दसिबें तुषार कपुरया यात्रा अप्वः हे ताःलाः । तुषारया डेब्यु फिल्म “मुझे कुछ कहना है” निसें न्ह्याःगु यात्राय् एक दो तीन, शुटआउट एट लोखण्डवाला, क्या कुल है हम, क्या सुपर कुल है हम थेंज्याःगु गुलिखे फिल्म ला हिट हे जूगु खः । तर अथे जूसां व स्टारया दर्जा धाःसा आःतक नं काये मफुनि ।

बलिउडय् थःगु इलय् स्टार धकाः बय्बय् जूपिं कलाकारतय् मस्त मध्ये राज बब्बरया म्ह्याय् जुही बब्बर व काय् आर्या बब्बरया नं बलिउड यात्रा सुथां लाये मफुतसा राज बब्बरया स्मीता पाटिलपाखें दुम्ह काय् प्रतीक बब्बरया पलाः नं उलि क्वातुइ मफुनि । माला सिन्हाया म्ह्याय् प्रतिभा सिन्हाया बलिउड यात्रा सुथां लाये मफुतसा तनुजाया निम्ह म्ह्याय्पिं काजोल व तनिषाय् काजोल टप स्टार जुइत ताःलात तर तनिषा धाःसा तताम्हेसिया पलाखय् पलाः तयाः न्ह्याः वनेमफुत ।

थथे निम्हं मस्त बलिउडय् हिरोइन जुइत याःगु कुतलय् बबिता व रणधीर कपुरया निम्ह म्ह्याय्पिं करिश्मा कपुर व करिना कपुर धाःसा निम्हं थःथःगु ईया स्टार धायेकेत ताःलात । अथे हे छगू जमानाया सुपरस्टार हिरोइन शर्मिला टैगोरया काय सैफ अलि खान बलिउडय् चलय् जुयाच्वंगु दुसा वया म्ह्याय् मय्जु सोहा अलि खान धाःसा बलिउडय् उलि चलय् जुइमफुत ।

विनोद खन्नाया निम्ह काय् मध्ये अक्षय खन्नां बलिउडय् छुं भतिचा जूसां थःगु छाप त्वःतेत ताःलात, तर मेम्ह काय् राहुल खन्नाया पलाः धाःसा उलि क्वातुइ मफुत । मिथुन चक्रवर्तिया काय् मिमोह यानिकी महाक्षय चक्रवर्तिया पलाः नं अबुया हामोग्वछी हे जुइ मफुत । हिरोतय् जक मखु भिलेनतय् मस्तय् चर्चा यायेगु खःसा “शोले”या गब्बर अमजद खानया काय् शादाब खानया डेब्यु फिल्म “राजा कि आएगी बारात” हे फ्लप जुयाबिउबलय् वयागु पलाः उलि थातं लायेमफुत । अमजद खान धयाम्ह पुलांगु जमानाया कलाकार जयन्तया काय् खः । जयन्तया निम्ह काय्पिं मध्ये अमजद खानया पलाः याउँक हे ताःलात, मेम्ह काय् ईम्तियाज खानया पलाः धाःसा अथे ताःलाये मफुत ।

बलिउडय् स्टार किड्सया रुपय् बय्बय् जूपिं छुं छुं कलाकारत थः हे स्टारया रुप काःपिं नं दु । सुनिल दत्तया काय् संजय दत्त, राकेश रोशनया काय् ऋतिक रोशन, ऋषि कपुरया काय् रणवीर कपुर उकिया दसु खःसा शत्रुघन सिन्हाया म्ह्याय् सोनाक्षी सिन्हा बलिउडय् बांलाक न्ह्यावनाच्वंगु दु । अनिल कपुरया म्ह्याय् सोनम कपुरया पलाः धाःसा उलि सुथां लाये मफुत ।

अथेहे कमल हसनया म्ह्याय् श्रुति हसनया पलाः नं न्ह्याः वनाच्वंगु दु । तर श्रुतिया केहेँमय्जु अक्षरा नं “शमिताभ” फिल्मय् खनेदयेकःवःगु खःसां वयागु पलाः ताःलाये मफुत । बलिउडय् फ्लप जूपिं स्टार सनय् शशी कपुरया निम्ह काय्पिं कुणाल व करण नं खःसा राजकपुरया काय्पिं रणधीर कपुर व राजीव कपुर नं खः । बरु राजकपुरया माहिलाम्ह काय् ऋषि कपुर धाःसा बलिउडय् ताः ईतक लोकंह्वाना च्वंम्ह हिरो खः । थुकथं स्वयेबलय् बलिउडय् आपाः यानाः स्टारतय् मस्त फ्लप जूगु खनेदुसां बलिउडय् थःगु न्हाय् धस्वाकेत ताःलापिं नं मदुगु मखु धइगु खँ ल्ःवमंके मजिउ ।

सम्बन्धित बुखँ

LEAVE YOUR COMMENTS