ने. सं. ११४४ कछलागा द्वादशी -

जीवनया सम्भावना दुगु ग्रह

वैज्ञानिकतय्सं पृथ्वी थेंज्याःगु मेगु छगः ग्रह लुइकूगु दु, गुगु ग्रहय् पृथ्वीइ थें हे जीवनया सम्भावना दु । वैज्ञानिकतय् कथं थ्व ग्रहय् लः नं दु, अले पृथ्वीइ थेंज्याःगु मनूत च्वनेफइ कथंया अनुकुल तापमान नं दु । थ्व ग्रहया आकार पृथ्वी स्वयां थ्यंमथ्यं निदुगं तग्वः, तर थनया तापमान धाःसा मनू, जीवजन्तयात अनुकुल कथं शून्य निसें ४० डिग्री सेल्सियस तकया दुने दु ।

वैज्ञानिकतय्सं थ्व ग्रहया नां आःयात प्द्द(ज्ञडद्य धकाः बियातःगु दु, अले थ्व ग्रह पृथ्वी स्वयां थ्यंमथ्यं १११ प्रकाश वर्ष तापाक दु ।पृथ्वी स्वयां तसकं तापाक लाःगुलिं खगोलशास्त्रीतय्त थ्व ग्रहया बारे बांलाक अध्ययन यायेत थाकुयाच्वंगु दु । उकिं हे थ्व ग्रहय् जीवनया सम्भावना दु धयागु सिइकूसां थन न्हापां निसें छुं जीव दु ला धयागु धाःसा सिइके फयाच्वंगु मदुनि ।

वइगु छुं दशक लिपा वैज्ञानिकतय्सं अन जीव दु ला धयागु माले फइगु आशा यानाच्वंगु दु । गुलि याकनं अत्याधुनिक टेलिस्कोप दयेकी, उलि हे थुगु ग्रह बारे अनुसन्धान याये नं अःपुइ ।थ्व ग्रहया बारे अध्ययन यानाच्वंगु खगोलविद्तय् पुचःया नेतृत्व यानाच्वंम्ह क्यानाडा युनिभर्सिटी अफ मोन्ट्रियलया प्रोफेसर बियर्न बेनेकं धाःगु दु, ‘न्हापांखुसी पृथ्वी बाहेक मेगु ग्रहय् धाथें लः दुगु व बाफ वयाच्वंगु खंकागु दु ।

थ्व ग्रह थज्याःगु थासय् दु, गन पर्याप्त मात्राय् ऊर्जा चूलानाच्वंगु दु । गथे पृथ्वीयात सूर्यपाखें ऊर्जा चूलाइगु खः । थ्वहे कारणं थन जीवनया सम्भावना खनाच्वनागु दु ।’प्रोफेसर बेनकया कथं थ्व ग्रह पृथ्वीलिसे ज्वःलाःसां यक्व खँय् पृथ्वी स्वयां फरक नं दु ।

उकिं वय्कःया बिचाः दु, थ्व ग्रहयात पृथ्वलिसे तुलना याना स्वयेबलय् भचा सावधान जुयाः हे यायेमाली । छगू ला थ्व ग्रह पृथ्वी स्वयां थ्यंमथ्यं निदुगं तग्वः ।खगोलविद्तय् धापु कथं थ्व ग्रहया बारे अझं यक्व खँ सिइके ल्यं दनि । झीसं नं आशा याये पृथ्वीं पिनेया जीवन बारे झीसं नं याकनं सिइके फइ ।