‘बंगलादेशया मातृभाषी सहिद लुमन’

येँ-अन्तर्राष्ट्रिय मातृभाषा दिवसया लसताय् वंगु आइतवाः थनया जनबहालय् नेपालभाषा साहित्य व म्येँ ब्वज्या जुल । केलत्वाःया नेपाःमिया नामं ग्वसाः ग्वःगु ज्याझ्वः नेपाःया राष्ट्रिय म्येँ नेवाः भासं भाय् हिलाः उपस्थित सकसिनं हालाः न्ह्याकूगु खःसा ज्याझ्वलय् येँ महानगरपालिका वडा नं. २५ वडाअध्यक्ष नीलकाजी शाक्यं लसकुस यानादीगु खः ।

नेपालभाषा साहित्य ख्यःया आपालं नांजाःपिं साहित्यकारलिसें न्हूपिं च्वमिपिंसं थःथःगु रचना पाठ यानादीगु खःसा कलाकारतय्पाखें सांगीतिक प्रस्तुति बियादीगु खः । ज्याझ्वलय् जनकवि दुर्गालाल श्रेष्ठं थौंकन्हय् उसाँय् मदयाः यलया भैंसेपाटीइ च्वंगु मेडिसिटी अस्पतालय् वासः याकाच्वनादीम्ह नेवाः न्ह्यलुवा, राजनीतिज्ञलिसें वरिष्ठ समालोचक प्रा. माणिकलाल श्रेष्ठयात कयाः च्वयादीगु ‘भेन्टिलेटरय् माणिकलाल’ नांया चिनाखँ न्यंकादीगु खः ।

ज्याझ्वलय् नवासें जनकवि दुर्गालालं मांभाय् दिंया लसताय् ग्वसाः ग्वःगु ज्याझ्वःया दबुलिइ थः दनाच्वनागु इलय् बंगलादेशय् मांभाय्या निंतिं थःगु प्राण आहुति बिउपिं सहीदया लुमन्ति वयाच्वंगु व इपिं सहीदय लुमन्ति वयाच्वंगु इलय् थः म्वाना च्वनागुया अनुभूति जूगु खँ धयादीगु खः । उगु ज्याझ्वलय् लोककवि राजभाई जकःमि, कवि सुरेश किरण, नवीनप्रकाश श्रेष्ठ, उमेश स्थापित, राजा वज्राचार्य, विमला मानन्धर लगायतं चिनाखँ न्यंकादीगु खः । अथे हे शरद कसाः व ज्ञानीराजा मानन्धरं बाखं, पुष्कर माथेमां हाइकु, रामेश्वर मिश्रण श्रेष्ठं मुक्तक न्यंकादीगु खः ।

थुकथं हे पद्मानन्द शाक्य, अञ्जन श्रेष्ठ, सरस्वति मानन्धर, मय्जु सुमन मानन्धर, रविन्सन कसाः, प्रतिमा वज्राचार्य, रामकृष्ण खड्गी, लजना मानन्धर लगायतया कलाकारं म्येँ न्यंकादीगु खः ।