ने. सं. ११४४ कौलाथ्व तृतीया -

ताम्रकार समाजया फोटोग्राफी प्रशिक्षण

यल – ताम्रकार समाजया युवा तथा खेलकुद उपसमितिया ग्वसालय् निन्हुयंकंया फोटोग्राफी तालिम क्वचाःगु दु । तालिमय् सहभागि प्रशिक्षार्थीतय्त मूपाहां प्रदेश नं. ३ या प्रदेशसभा सदस्य शाोभा शाक्यं दसिपौ लःल्हानादीगु खः । ज्याझ्वलय् नवासें प्रदेशसभा सदस्य शाक्यं प्रदेश नं. ३ या मुख्य आधार धइगु हे थनया कला, संस्कृति व सम्पदा खः धयादिल । वय्कलं संघीयतां स्थानीय स्रोतसाधनया पहिचान व परिचालनय् महत्वपूर्ण भूमिका म्हितीगु जूगुलिं देय् विकासय् नं तिबः जू वनीगु खँ कनादिल ।

ज्याझ्वःया सभापतिलिसें ताम्रकार समाजया नायः रविन्द्रराज ताम्रकारं विशिष्ट महत्व दुगु प्रदेश नं. ३ या नां तयेबलय् स्थानीयतय् मनोभावयात थुइकेमाःगु आवश्यक जूगु खँय् बः बियादिल । लिसें वय्कलं स्थानीय निकायय् स्थानीय मांभाय् छ्यले दयेमाःगु खँय् बः बियादिसें यल जिल्लाय् अपार सम्भावना दुगुलिं उकिया प्रवद्र्धनया निंतिं जिल्लापाखें निर्वाचित प्रदेश व प्रतिनिधिसभाया सदस्यपिंसं बः बीमाः धयादिल ।

ज्याझ्वलय् अष्ट्रेलियाय् व्यवसायिक फोटोग्राफी याना वयाच्वनादीम्ह नापं तालिमया प्रशिक्षक कृर्तन ताम्रकार, प्रशिक्षार्थी रुपकदास ताम्रकार, उपसमितिया संयोजक सजेश ताम्रकारं नं थःथःगु नुगःखँ तयादीगु खः । तालिमय् मुक्कं झिंच्याम्हेसिनं ब्वति कयादीगु उगु ज्याझ्वलय् प्रदेशसभाय् निर्वाचित जुयादीम्ह ज्याझ्वःया मूपाहां शाक्ययात नेवाः परम्पराकथं सगं बियाः भिंतुना नं देछाःगु खः ।