लोकसाहित्य परिषद् भवन उलेज्या

यल -शताब्दीपुरुष सत्यमोहन जोशीं बिउगु जग्गाय् दयेकूगु लोकसाहित्य परिषद् भवन मंगलवाः उलेज्या जुल । मूपाहाँ प्रतिनिधि सभा सांसद कृष्णलाल महर्जनं उलेज्या यानादीगु खः । शताब्दीपुरुष जोशीं परिषद्यात बिउगु थःगु हकहिस्साय् लाःगु २ आना २ पैसा जग्गाय् सांसद महर्जनया सांसद् कोषया ५०लाख तकाया ग्वाहालिं थुगु भवन दयेकूगु खः ।

थ्व भवन दयेकेत नितिं १ करोड ५० लाख खर्च जुइगु अनुमान ई. सुशिल व्यञ्जनकारं यानादीगु खः । सांसद महर्जनया सांसद कोषं वःगु ५० लाख आर्थिक ग्वाहालिं दयेकेगु सुरु जूगु खःसा थुगु भवन दयेकेत बागमती प्रदेश सभासद ज्ञानेन्द्र शाक्य, वल्र्ड नेवाः अर्गनाइजेशनलगायत जनसहभागितापाखें करिब ८८ लाख आर्थिक ग्वाहालि चूलाःगु खः परिषद्या दांभरिं वासुदेव श्रेष्ठं कनादीगु दु ।

आजीवन नेपालभाषा साहित्य विकासया नितिं जुयाः नं थःगु श्रीसम्पत्ति भाषिक संस्थाया निंतिं बियादीपिं अग्रजपिं कविकेशरी चित्तधर हृदय (नेपालभाषा परिषद्), भाषा निभाः प्रेम बहादुर कंसाकार (आशा सफू कुथि व च्वसापासा)यात लुमंकुसें नेवाः न्ह्यलुवाः मल्ल के सुन्दरं ज्याझ्वलय् न्ववानादिसें संस्था नीस्वनेत गुलि थाकु संस्थायात मदिक्क न्ह्याकेगु अझ अप्वः थाकूगु खँ कनादिल । बहुभाषिक, बहु संस्कृतिया धनी देय् नेपाःया कला, संस्कृतियात लोकसाहित्य मार्फत छथाय् हे कयाः परिषदया थ्व भवनयात देय्या ग्यालरी कथं विकास यायेगु लक्ष्य दुगु भाजुं जोशीं कनादिल ।

परिषद्या नायः प्रा. प्रेमशान्ति तुलाधरया सभापतित्वय् जूगु ज्याझ्वलय् ने.सं. १०६४ या हस्तलिखित लयपौ ‘नेपाल’ या बिश्लेषणात्मक अध्ययन यानाः उपप्रा. निर्मला श्रेष्ठं तयार यानादीगु शोधग्रन्थ ‘नेपाल’ मूपाहां सांसद कृष्णलाल महर्जन, प्रदेश सभासद् ज्ञानेन्द्र शाक्य, शताब्दी पुरुष सत्यमोहन जोशी व प्रा. प्रेमशान्ति तुलाधरं मंकाः कथं पितब्वज्या यानादीगु खः ।

सम्बन्धित बुखँ

LEAVE YOUR COMMENTS