बुद्ध बारे भ्रम न्यंकूगुलिं ज्ञापनपौ

येँ – भगवान बुद्धयात ‘तेश्रोलिङ्गी’ धकाः छगू सफुली च्वयातःगु खँयात कयाः येँया लामा भिक्षुत दुःखी जूगु दु । सफुली च्वया तःगु उगु खँयात संशोधन याकेया लागिं लामा भिक्षुपिंसं म्हिगः प्रेस काउन्सिल नेपालय् वनाः अनया कार्यवाहक अध्यक्ष किशोर श्रेष्ठयात नापलानाः ज्ञापनपौ लःल्हाःगु दु ।

अच्युत अर्याल ‘मोक्ष’ नामं च्वमिं च्वयातःगु उगु सफुली भगवान बुद्ध तेश्रो लिङ्गी जूगु खँ न्ह्यथनातःगु खँ धाःगु दु । उगु सफुली बुद्ध तेश्रो लिङ्गी जूगु कारणं गनं नं छुं याये मफयाः उखेंथुखें लतंफतं जुया जुइगु व लिपा छुं याये मफयाः दरवार हे त्याग यानाः पिहां वंगु खः धकाः च्वयातःगु खँ धाःगु दु ।

सफुली च्वयातःगु थ्व धापू तसकं आपत्तिजनक जूगु कारणं उकियात भिंकेमाः धकाः इनाप यासें लामा भिक्षुपिंसं थीथी थासय् ज्ञापनपौ बीगु ज्या यानाच्वंगु खःसा थ्वहे झ्वलय् उपिं म्हिगः प्रेस काउन्सिल नं थ्यंगु खः ।

लामा भिक्षुपिंसं थ्व सफू आः खस नेपाली भासं जक पिहां वःगु खःसां लिपा अंग्रेजी लगायत मेमेगु भासं नं अनुवाद जुयाः पिहां वन धाःसा थुकिं भगवान बुद्धया बारे हानं मेगु भ्रम ब्वलंकेफुगु जुयाः सफूयात इलय् हे संशोधन याकेमाःगु माग लामा भिक्षुपिंसं याःगु दु ।