पत्रकारिताय् स्नातकोत्तर यायेत किपू नगरपालिकां छात्रवृत्ति बीगु

किपू – किपू नगरपालिकां पत्रकारिता विषयय् स्नातकोत्तर यायेगु निंतिं छात्रवृत्ति बीगु जूगु दु । किपू नगरपालिकाया ग्वाहालिं सन्ध्या टाइम्स पिथना प्रा.लि.या ग्वसालय् आइतवाः निसें किपुली सुरु जूगु पत्रकारिता तालिमया उलेज्या यानादिसें किपू नगरपालिकाया मेयर रमेश महर्जनं थ्व खँ धयादीगु खः ।

ज्याझ्वलय् न्ववानादिसें मेयर महर्जनं किपूबारे प्रचार प्रसार यायेगु लिसें पत्रकारिता ख्यलय् स्थानीय व्यक्तिया शीप विकास यायेगु ताः तयाः तालिम संचालन यानागु खँ धयादीगु खः । ‘किपू नगर देय्या राजधानी येँय् दुने हे लाःगु नगर खःसां प्रचार प्रसारया म्होतिं यानाः थ्व नगर ध्याकुनय् लानाच्वंगु दु । उकिं किपूया प्रचारप्रसार यानाः किपुली पर्यटकीय विकास यायेगु निंतिं स्थानीय मनूत हे सक्षम जुइमा धयागु ल्याखं थ्व तालिम न्ह्याकागु खः’ वय्कलं धयादीगु दु । थ्व तालिम प्रारम्भिक तालिम जक जूसां लिपा थप तालिम बीफइगु लिसें किपू नगर दुनेया सुनां नं पत्रकारिता विषयय् स्नातकोत्तर यायेगु मं दुसां वयात किपू नगरपालिकापाखें छात्रवृत्ति बीगु खँ नं वय्कलं धयादीगु खः ।

किपू नगरपालिका भवनय् जुयाच्वंगु थ्व तालिमय् किपूया झिगुलिं वडायापिं सहभागी जुयाच्वंगु दुसा मू प्रशिक्षक कथं नेपालभाषा टाइम्सया सम्पादक सुरेश मानन्धरं तालिम बियाच्वंगु दुसा पाहाँ प्रशिक्षक कथं कान्तिपुर न्हिपौया सहायक सम्पादक हिमेश वज्राचार्यं तालिम बीगु ज्याझ्वः दु ।

सम्बन्धित बुखँ

LEAVE YOUR COMMENTS