अमिताभया परोपकारी ज्या

येँ– राष्ट्रिय विभूति शंखधर साख्वाःयात लुमंकाः शंखधर दिवस हनाच्वनासां यक्व न्हू पुस्तां शंखधरया योगदान बारे मसिउ जुइ । सामान्य व्यापारी शंखधरं उगु इलय् देशय् च्वंपिं सकसिगुं त्यासा पुलाः जनतायात त्यासां मुक्त यानाः नेपाल संवत् सुरु याःगु खः । शंखधरं देय्या जनतायात ऋण मुक्त यानाः नेपाःया मौलिक संवत् नेपाल संवत् सुरु याःगुलिं हे थौं झिंछसः दँ थ्यनेधुंकाः नं वसपोलयात लुमंका वयाच्वनागु दु ।
आः हिन्दी फिल्मय् लोकंह्वाःम्ह कलाकार अमिताभ बच्चनं नं अथेहे जनताया त्यासा पुलाः थःगु परोपकारी ज्या न्ह्यब्वःगु दु । अमिताभं देया सकलें जनताया मखुसां छथ्वः किसानतय् त्यासा पुलाबिउगु दु । भारतया उत्तर प्रदेशया झिंप्यसःम्ह किसानतय् त्यासा अमिताभं पुलाबिउगु खः । अमिताभ नं थ्व हे प्रदेशं वःम्ह खः । भारतया सरकारी बैंक बैंक अफ इन्डियायात बच्चनं प्यंगू करोडं मल्याक ध्यबा पुलाबिउगु खः । बैंकं नं किसानतय्सं त्यासा काःबलय् बरः च्वयातःगु भ्वं फुक्कं अमिताभ बच्चनयात लःल्हायेधुंकूगु दु ।
अमिताभ बच्चनं थःगु ट्विटर मार्फत आः थ्व भ्वं फुक्क किसानतय्त थःम्हं हे लःल्हायेगु खँ धाःगु दु । थुकिया निंतिं किसानतय्त मुम्बइलय् सःतूगु दु । अले किसानत वयेत समस्या जुइ धकाः रेलया छगः डब्बा हे किसानतय्त हयेगु निंतिं बुक याःगु दु । बच्चनं न्हापा नं मुम्बइया निसलं मल्याक किसानतय् त्यासा थथे हे यानाः पुलाबीधुंकूगु दु ।
अमिताभया थ्व परोपकारीया ज्याया निंतिं वयात नं लिपा थ्यंक लुमंका हे तइगु जुइ ।

नेपालभाषा टाइम्स

च्वमिया मेमेगु

• निम्ह साहित्यकारया थौं बिचाः मुँज्या
• एमालेया संकल्प यात्रायात पहिचानवादीया हाथ्या
• शरणार्थी काण्डय् गुम्हेसित कुना हे तइगु
• भाषा विधेयक राजपत्रय् पिहां वल
• रुसी सेनाय् नेपाःमि बारे अध्ययन समिति