चुलिंचू नापलाःबलय्

भारतया चर्चित उद्योगपति मुकेश अम्बानीया म्ह्याय् ईशा अम्बानीया इहिपाया ज्याझ्वलय् विश्वस्तरयानिसें भारतीय राजनीतितज्ञतय् नं तःधंगु मात्राय् उपस्थिति दुगु खः । अन हे भारतीय फिल्म उद्योगया आपालं चर्चित कलाकारया उपस्थिति जक मखु, गुलिसिनं ला इहिपाया ज्याझ्वः स्वयां न्ह्यः जूगु ‘प्रि–वेडिंग’ ज्याझ्वलय् थःथःगु प्रस्तुति नं बिल ।

बलिउड फिल्म उद्योगया अमिताभ बच्चन, ऐश्वर्या राय बच्चन, प्रियंका चोपडा, दीपिका पादुकोण, शाहरूख खान, सलमान खान थेंज्याःपिं आपालं चर्चित कलाकारतय् उपस्थिति दुगु खः । अथे हे करिना कपुर खान नं थः भाःत सैफ अली खान व तता करिश्मा कपुरलिसें ईशाया इहिपाया ज्याझ्वलय् थ्यंकः वःगु खः ।

व हे इहिपाया ज्याझ्वलय् करिनाया पुलांम्ह प्रेमी शाहीद कपुर नं थः कलाः मिरा राजपुतलिसें थ्यंकः वःगु खः । इहिपाया ज्याझ्वलय् उखेंथुखें जुइगु झ्वलय् करिना कपुर, शाहीद व मिरा तसकं सतिक च्वनाच्वंगु खँय् सकसिगुं ध्यान सालाकाल । भारतीय संचार माध्यमया कथं करिना व शाहीदया ब्रेकअप लिपा थुपिं निम्हेसिया मित्रता थुलि क्वातुगु खने दत कि निम्हेसिनं थःपिनिगु मित्रतायात तसकं बांलाःगु व्यवहारं प्रष्ट यानाबिल ।

थन तक कि मिरा व करिना छम्हं मेम्हसित घय्पुया थःपिनिगु क्वातुगु मित्रताया दसु तकं क्यनाबिल । करिना व मिराया जक खँ मखु थुपिं निम्हेसिया भाःत सैफ व शाहीदं नं उकथंया हे व्यवहार यानाक्यन । थुकिं यानाः बलिउडय् ब्रेकअप लिपा छम्हं मेम्हेसिया ख्वाःतकं मस्वयेगु परम्परायात त्वाःथलाः न्हूगु परम्परा कायम याःगु खँय् आपालं चर्चा जुल ।

सम्बन्धित बुखँ

LEAVE YOUR COMMENTS