निर्वाचनया तयारी यायेत आयोगयात प्रमया ओलीया निर्देशन

येँ – प्रधानमन्त्री केपी शर्मा ओलीं वइगु वैशाख १७ व २७ गते क्वःछिउगु निर्वाचन यायेगु कथं तयारी यायेत निर्वाचन आयोगयात इनाप यानादीगु दु । म्हिगः निर्वाचन आयोगय् वनाः वय्कलं उगु इनाप यानादीगु खः । थ्व स्वयां न्ह्यः नेकपा विवाद लिपा प्रचण्ड–नेपाल पक्षं वइगु वैशाखय् निर्वाचन जुइमफगु खँ धासें निर्वाचन प्रक्रिया न्ह्यःने मह्याकेत इनाप याःगु खः ।

म्हिगः प्रधानमन्त्री केपी ओलीं निर्वाचन आयोगया ज्याकुथी वनाः निर्वाचनया तयारी बारे जानकारी कयादीगु खःसा निर्वाचनया तयारी निरन्तर रुपं न्ह्याकेत सुझाव बियादीगु खँ प्रमया प्रेस सल्लाहकार सूर्य थापां कनादीगु दु ।

थापाया कथं प्रम ओलीं आयोगया तयारी बारे प्रमुख निर्वाचन आयुक्त दिनेश थपलिया व आयुक्तपिंत उगु इनाप यानादीगु खः । आयोगया पदाधिकारीपिसं आयोगया तयारी, सुरक्षा, बजेट लगायत विषयसं जानकारी याकूगु खः ।

म्हिगःया बैठकय् प्रधानमन्त्री ओली व आयोगया दथुइ नेकपा विवाद बारे धाःसा छुं हे कथंया सहलह मजूगु खँ थापां कनादीगु दु । वय्कलं आयोगं माघ ११ गते याःगु निर्णय व माघ २० सं लाःगु निवेदनया बारे सामान्य जानकारी जक प्रधानमन्त्रीयात याकूगु खः । निर्वाचनया बारे सहलह यायेगु नितिं प्रम ओली आयोगया ज्याकू कान्तिपथय् वंगु खः ।

निर्वाचन आयोगया पदाधिकारीपिंत निर्देशन बीगु झ्वलय् प्रम ओली थम्हं आः तक सूर्य चिं बाहेक मेगु चिं कयाः निर्वाचन मल्वाःनिगु खँ धयादिसें अघोषित रुपं सूर्य थःत माःगु दावी नं यानादीगु दु ।

निर्वाचन आयोगया सूत्रया कथं आयोगं वइगु वैशाखय् निर्वाचन यायेगु नितिं थीथी कथंया तयारी यानाच्वंगु दु । तर राजनीतिक दलया लिसें नागरिक समाजं तकं वैशाखं निर्वाचन जुइगु सम्भावना मदु धकाः धयाच्वंगु इलय् प्रमया निर्वाचन आयोगया भ्रमणयात नं अर्थपूर्ण रुपं काःगु दु ।

थ्वहे झ्वलय् सरकारं चुनावया निंतिं माःगु बजेट व्यवस्था याःगु खँ सीदुगु दु । सरकारं निर्वाचनया निंतिं ७ अर्ब बजेट विनियोजना याःगु खः ।तर निर्वाचन यायेगु निंतिं २० अर्ब स्वयां अप्वः खर्च जुइगु खँ धाःगु दु ।

सम्बन्धित बुखँ

LEAVE YOUR COMMENTS