चिडियाखानाया पशुपंछी नं द्यां लाइन

येँ (नेपालभाषा टाइम्स) – स्वनिगःया छगूयां छगू जक चिडियाखाना संकटय् लाःगु दु। कोरोनां यानाः बन्द जुयाच्वंगु चिडियाखानाय् पशुपंछीतय्त नकेत तकं समस्या वये फइगु खँ चिडियाघर प्रशासनं धाःगु दु। चिडियाखानां धाःकथं आः तक अन दुगु नसात्वँसा पशुपंछीतय्त नकेगु याना वयाच्वंगु खःसा आः निलायात जक नसात्वँसा दनि ।

निला तक नं चिडियाखाना चायेके मफुत धाःसा सरकारयात ग्वाहालिया लागिं इनाप यायेगु बाहेक मेगु विकल्प मदु। चिडियाखानाया प्रवक्ता चिरञ्जीवीप्रकाश पोखरेलया कथं चिडियाखानाया जीवजन्तुया आहारया निंतिं जक दँय् निगू करोड तका खर्च जू । दँय् १० करोड तका आम्दानी याना वयाच्वंगु चिडियाखानाय् कोरोना संक्रमणया कारणं आम्दानी ठप्प जुयाच्वंगु दु ।

थौंकन्हय् चिडियाखानाय् ११० प्रजातिया पशुपंछीत लहिनातःगु दु। उकी मध्ये झंगःपंक्षीया ल्याः द्वःछि स्वयां अप्वः दु। थुगु चिडियाखाना जुद्धशम्शेरया पालय् शुरु जूगु खःसा २०१९ साल लिपा जक नेपाल सरकारं थःगु संरक्षणय् काःगु खः ।