पंचवीर सिरपाः लःल्हात

येँ- युबा बौद्ध समूहपाखें प्रत्येक बुद्ध संवत दुने बुद्ध धर्म सम्बन्धी उत्कृष्ट च्वसु च्वयादीपिं छम्ह मिजं व छम्ह मिसा च्वमियात बीगु पंचवीर सिंह सिरपाः वंगु शनिवाः छगू ज्याझ्वःया दथुइ लःल्हाःगु दु ।

समूहया नायः मदनबहादुर तुलाधरया सभापतित्वय् थनया गणमहाविहारय् जूगु ज्याझ्वलय् उगु सिरपाः लःल्हाःगु खः । ‘नेपालभाषा टाइम्स’ न्हिपती बुद्ध संवत् २५६३ दँय् पिहां वःगु बुद्ध घर्म सम्बन्धी उत्कष्ट च्वसुया च्वमिकथं मिजंपाखे पत्रकार हिमेशरत्न वज्राचार्य, मिसा च्वमि शोभानानी शाक्यात उगु सिरपाः लःल्हाःगु खःसा बुद्ध संवत् २५६२ दँया निंतिं उपप्राध्यापक डा. त्रिरत्न मानन्धरयात सिरपाः लःल्हाःगु खः ।

डा. मानन्धरया ‘धर्म गुबले यायेगु ?’, पत्रकार वज्राचार्यया ‘बुद्ध झीथाय् गबले वल ?’ व च्वमि शाक्यया ‘बुद्ध धर्मया महायान चर्याय् चतुर्निंवृत्ति अभ्यासया महत्व’ शीर्षकया निंतिं उगु सिरपाः लःल्हाःगु खः ।

अखिल नेपाल भिक्षु महासंघया महासचिवलिसें बुद्ध विहारया प्रमुख भिक्षु कोण्डन्य महास्थविरं उगु सिरपाः लःल्हानाबिज्याःगु खः । नेपालभाषाया माध्यमं बुद्ध धर्म सम्बन्धी च्वसु च्वयाः बुद्ध धर्मया प्रवद्र्धन व प्रचारय् उल्लेख्य भूमिका म्हितूपिंत पुरस्कृति यायेगु ल्याखं पंचवीर सिंह तुलाधरं नीस्वनादीगु पुरस्कार हनापौलिसें राशी ११,१११/- तका दां खः ।

बुद्ध संवत् २५६२ दँया च्वसुया निंतिं सहप्राध्यापक मदनरत्न मानन्धर व लोचनतारा तुलाधर बुद्ध संवत् २५६३ दँया च्वसुया निंतिं गौतमवीर वज्राचार्य व धर्मसुन्दर वज्राचार्य दुथ्याःगु निर्णायक पुचलं उत्कृष्ट च्वसु ल्यःगु खः ।
उगु हे ज्याझ्वलय् ईलोहँ पंचवीर परियत्ति सिरपाः रुबी शाक्ययात लःल्हाःगु खः ।