सिद्धार्थया पुलांपिं विद्यार्थीपाखें चिकित्सालययात आर्थिक ग्वाहालि

येँ- सिद्धार्थ वनस्थली इन्ष्टिच्यूटया पुलांपिं विद्यार्थीतय्सं छत्रपाति निःशुल्क चिकित्सालययात ग्वाहालि याःगु दु । सिद्धार्थ वनस्थलीया ४७ साल ब्याचया विद्यार्थीतसं चिकित्सालयय् अक्सिजन प्लान्ट जडानया निंतिं छगूत्या लख आर्थिक ग्वाहालि याःगु खः ।

विद्यार्थीतय् पुचलं उगु आर्थिक ग्वाहालि चिकित्सालयया अध्यक्ष डा. मनोजमान श्रेष्ठयात लःल्हानादीगु खः । पुलांपिं विद्यार्थीतय् पुचःया नेतृत्व यानादिसें पुलांम्ह विद्यार्थी दीपक जोशीं कोरोना संक्रमणया महामारी नियन्त्रणया निंतिं शुरुनिसें थःपिंसं थीथी थासय् थीथीकथं ग्वाहालि याना वयाच्वनागु जानकारी बियादीगु खः ।

चिकित्सालयया अध्यक्ष डा. श्रेष्ठं पुलांपिं विद्यार्थीतय् ग्वाहालिया निंतिं कृतज्ञता प्वंकादिसें कोरोना संक्रमितयात स्तरीय स्वास्थ्य सेवा बीत चिकित्सालय न्ह्याबले नं तत्पर दु धयादिल ।
उगु इलय् वय्कलं चिकित्सालयय् अत्याधुनिक प्रविधिया आइसीयु, पोर्टेबल एक्स–रे मेसिनलिसें स्तारीया सेवाया निंतिं अत्याधुनिक मेशिन व प्रविधि नं जडान यायेगु ज्या जुइधुंकूगु व आः अक्सिजनया समस्या जुइके मबीत अक्सिजन प्लान्ट तयेगु तयारी जुयाच्वंगु नं जानकारी बियादिल ।

पुलांपिं विद्यार्थीपिं डा. सोना श्रेष्ठ, डा. मिरु गुरुङ, डा. सपना श्रेष्ठ, डा. निरज श्रेष्ठया सक्रियताय् देय्या थीथी थासय् ग्वाहालि याना वयाच्वनागु व उकियात हे निरन्तरता बीगु झ्वलय् थःपिं चिकित्सालयय्तकं थ्यंगु जोशीं कनादिल । उगु इलय् सिद्धार्थ वनस्थली ४७ साल ब्याचया विद्यार्थीपिं सरल प्रधान, दिपिन श्रेष्ठ, राजीव श्रेष्ठ, प्रमोद सुवाल, भूपेन्द्र श्रेष्ठ लगायतया उपस्थिति दुगु खः ।

थ्व हे झ्वलय् न्हिं १०० गः सिलिन्डर जायेके फइगु अक्सिजन प्लान्ट जडानया निंतिं तयारी जुयाच्वंगु चिकित्सालयं जानकारी बिउगु दु । अक्सिजन प्लानट जडानया निंतिं कुल छगू करोड पीन्यागू लाख आवश्यक जूगु व उकीमध्ये आतक ९० गू लाख तक संकलन जुइधुंकूगु नं चिकित्सालयं जानकारी बिउगु दु ।

सम्बन्धित बुखँ

LEAVE YOUR COMMENTS