मेलम्चीया लः हयेगु तयारी लिपांगु चरणय्

येँ (नेपालभाषा टाइम्स) – बहुप्रतिक्षित मेलम्चीया लः स्वनिगलय् हयेगु निंतिं जुयाच्वंगु तयारी लिपांगु चरणय् थ्यंगु दु। मेलम्ची खानेपानी विकास समितिं स्वनिगलय् लःया समस्या ज्यंकेत मेलम्ची हयेगु निंतिं हाकनं परीक्षणया तयारी जुयाच्वंगु इलय् लः वितरणया निंतिं जुयाच्वंगु आवश्यक तयारी नं लिपांगु चरणय् थ्यंगु जानकारी बिउगु दु ।

समितिं लः हाकनं परीक्षणया तयारी जुयाच्वंगु इलय् आयोजना कार्यान्वयन निर्देशनालयं अप्वःथें थासय् न्हूगु व गुलिखे थासय् पुलांगु हे पाइपपाखे. लः वितरण यायेगु तयारी न्ह्याकूगु खः । लः वितरणया निंतिं आवश्यक पूर्वाधार निर्माण याये सिधःगु थासय् परीक्षण यायेगु ज्या जुयाच्वंगु निर्दे शनालयया सूचना अधिकारी उज्जवल प्रजापतिं जानकारी बियादिल ।

वय्कलं कनादीकथं निर्देशनालयया जिम्मेवारी सुन्दरी जलय् लः क्वफायेधुंकाः स्वनिगलय् समानुपाति रुपं लः वितरण यायेत पूर्वाधार तयार यायेगु ज्या जुयाच्वंगु दु। आपालं ज्या सिधयेधुंकूगु दुसा छुं छुं ज्या धाःसा अझ ल्यं दनि । थ्व झ्वलय् निर्दे शनालयं न्हू निर्माण जूगु पाइपपाखें लः चुहावट जुयाच्वंगु दु वा मदु धइगु नं परीक्षण यानाच्वंगु दु । गुलिखे थासय् चिग्वःगु ट्यांकरं परीक्षण यानाच्वंगु दुसा गुलिखे थासय् धाःसा परीक्षण याये ल्यं दनि । परीक्षण याये ल्यं दुगु थासय् मेलम्च्ीया लः क्वफायेधुंकाः जक परीक्षण यायेगु वय्कलं धयादिल ।

समितिं न्हापांगु चरणय् मेलम्ची खुसिं न्हिं १७ गू करोड लिटर लः हयेत्यंगु दु। अथे हे निगूगु चरणय् याङ्ग्री व लार्के खुसिं थप १७/१७ करोड लिटर लः स्वनिगलय् वइ । न्हापांगु चरणय् वइगु लः वितरणया निंतिं पूर्वाधार निर्माण यायेगु ज्या जुयाच्वंगु खः । मेलम्चीया लः चक्रपथ दुनेया दक्वं थासय् वितरण यायेगु योजना दयेकाच्वंगु दुसा स्वनिलय् मेलम्चीया लः वयेधुंकाः पुलांगु पाइपं वितरण यायेगु नापनापं न्हूगु पाइपपाखें परीक्षण यायेगु ज्या नं जुइ ।

मेखे छुं दिं न्ह्यः लः परीक्षण यायेगु झ्वलय् सुरुबय् खने दुगु त्रुटि भिंकेगु ज्या नं सिधयेत्यंगु दुसा वयां लिपा हाकनं सुरुबय् लः छ्वयाः परीक्षण यायेगु योजना दयेकाच्वनागु खानेपानी मन्त्रालयया प्रवक्ता रितेशकुमार शाक्यं कनादिल । वय्कःयाकथं सुरुबय् दुगु त्रुटि भिंकाः उकिया पुनरावलोकन यायेगु ज्या जुयाच्वंगु दु ।