न्हूगु इजलास गठनया तयारी

येँ – संवैधानिक अदालतया निम्ह न्यायाधीशपिं इजलासय् मच्वनीगु जुइवं अन्ततः प्रधानन्यायाधीश चोलन्द्र शम्शेर जबरां मेगु संवैधानिक इजलास गठन याइगु जूगु दु । वय्कलं आः न्याय परिषद्या वरिष्ठताया आधारय् न्हूगु इजलास गठन यानादीत्यंगु खँ धाःगु दु । वइगु जेठ २३ गते संसद विघटन सम्बन्धी वहस न्हूगु इजलासय् शुरु जुइ ।
संवैधानिक इजलासय् च्वंपिं न्यायाधीशपिं तेजबहादुर केसी व बमकुमार श्रेष्ठया बारे कानुन व्यवसायीतय्सं न्ह्यसः थंगु कारणं वय्कःपिंत इजलासं पिने छ्वयेमाःगु अवस्था ब्वलंगु खः । तर वय्कःपिंसं इजलास मत्वःतेगु अडान कायेवं इजलासया मेपिं न्यायाधीशपिं आनन्दमोहन भट्टराई व दीपककुमार कार्कीं थज्याःगु विवादास्पद इजलासय् थःपिं च्वने मखु धकाः घोषणा यायेवं न्हूकथं इजलास गठन यायेत प्रधानन्यायाधीशयात दबाब लाः वंगु खः ।
थ्व बारे सल्लाह यायेत म्हिगः हे प्रधानन्यायाधीश जबरां सर्वोच्च बारया नेतृत्वलिसे नं खँ ल्हानादीगु खः । सर्वोच्च बारयात वय्कलं आः थम्हं वरिष्ठताया आधारय् संवैधानिक इजलास गठन यायेगु धकाः जानकारी बियादीगु खँ बारया अध्यक्ष लिसें संविधानविद् पूर्णमान शाक्यं ‘नेपालभाषा टाइम्स’ यात कनादिल ।
प्रधानन्यायाधीश जबरां यानादीगु थ्व निर्णयं आः बार व बेञ्च दथुइ जुयाच्वंगु ‘डेडलक’ चिलावंगु खँ नं डा. शाक्यं कनादिल । लिसें वय्कलं न्हापा न्हापा प्रधानन्यायाधीशं थःगु हे तजबिजया आधारय् संवैधानिक इजलास गठन यायेगु गुगु चलन जुयाच्वंगु खः आः अज्याःगु ज्या मजुइगु धासें आः वरिष्ठताया आधारय् इजलास गठनया चलन शुरु जुइगु बिचाः नं प्वंकादिल ।

सम्बन्धित बुखँ

LEAVE YOUR COMMENTS