राजपायात सरकारय् हयेत वार्ता शुरु

येँ – संविधान संशोधनया मुद्दायात प्रधानमन्त्रीं बेवास्ता याःगु धासें समाजवादी पार्टी सरकारं पिहां वनेवं नेकपां उकिया थासय् आः राष्ट्रिय जनता पार्टीयात सरकारय् हयेगु कुतः याःगु दु । समाजवादी पार्टी पिहां वनेवं दुई तिहाइ बहुमत गुमे याःगु ओली सरकारं राजपायात सरकारय् हयेत वार्ता पुचः हे नीस्वनाः सहलह न्ह्याकूगु खँ सूत्रं धाःगु दु । सूत्रया कथं राजपां नं संघीय सरकारय् वनेगु मनस्थिति दयेकाच्वंगु दुसा उकिया निंतिं छुं छुं शर्त न्ह्यःने तःगु दु ।

सरकारय् वनेगु बारे खँ ल्हायेत राजपां नं वार्ता पुचः दयेकूगु दुसा निगुलिं पुचः दथुइ अनौपचारिक वार्ता नं शुरु जूगु दु । सरकारलिसे वार्ता यायेत राजपां राजेन्द्र महतोया संयोजकत्वय् अध्यक्ष मण्डलया दुजःपिं महेन्द्र राय यादव व शरदसिंह भण्डारी दुगु समिति स्वंगु दुसा नेकपां महासचिव बिष्णु पौडेल, उपप्रधान लिसें रक्षामन्त्री ईश्वर पोखरेल व संसदीय दलया उपनेता सुवास नेम्वाङ दुगु समिति स्वंगु दु । वार्ता वय्कःपिनि दथुइ हे शुरु जूगु खँ सूत्रं धाःगु दु ।

राजपां सरकारय् वनेगु निंतिं थीथी स्वंगू माग न्ह्यःने हःगु खँ धाःगु दु । राजपां संविधान संशोधन यायेमाःगु, मधेश आन्दोलनयात कयाः नीस्वंगु गिरिशचन्द लाल आयोगया प्रतिवेदन सार्वजनिक यायेमाःगु व जेलय् कुनातःम्ह सांसद रेशम चौधरीयात त्वःतेमाःगु माग न्ह्यःने हःगु दु । उकथं हे झिंप्यंगू संवैधानिक निकाय मध्ये स्वंगू थःपिंत बीमाःगु व थःगु पार्टीयात संघीय सरकारय् प्यम्ह मन्त्री बीमाःगु माग नं राजपां न्ह्यःने तःगु खँ सीदुगु दु ।

सूत्रया कथं थःगु सरकारयात हानं दुई तिहाई बहुमत हे खाकेगु लागिं सत्तारुढ दल नेकपां राजपायात नं सरकारय् दुथ्याकेगु कुतः यानाच्वंगु खः ।