चीनया स्वंगू बन्दरगाह फ्वनीगु

येँ – स्वंगूगु मुलुकं नेपाः हइगु सामान भारत लँपुं जक हयेगु यानाच्वंगुली आः नेपालं चीनया लँपु जुयाः नं सामान हयेगु पहल याइगु जूगु दु । थुकिया बारे चीनय् मंगलवाःनिसें सुरु जुइगु वार्ताय् नेपालं चीनया स्वंगू बन्दरगाह नेपाःयात प्रयोग याके बी माल धकाः इनाप याइगु खँ सीदुगु दु ।
प्रधानमन्त्री केपी ओलीं निदँ न्ह्यः यानादीगु चीन भ्रमणया इलय् चीनलिसे व्यापार जक मखु पारवहन सन्धि समेत याना वःगु खः । उकियात हे निरन्तरता बी कथं आः चीनया बन्दरगाह प्रयोग यायेगु बारे वार्ता सुरु जुइत्यंगु खः ।

नेपालं चीनया छु छु बन्दरगाह प्रयोग यायेगु धकाः आः तक क्वःछिउगु मदुनि । वार्ताया झ्वलय् थ्व क्वःछीगु ज्या जुइ । अथे खःसां नेपालं चीनया निगू ड्राइपोर्ट व छगू सीपोर्ट प्रयोग यायेगु प्रस्ताव तइगु खँ धाःगु दु । चीनं नेपाःया राजधानी येँय् तक रेल हयेगु धकाः तयारी सुरु यायेधुंकूगु कारणं कन्हय् वहे रेलमार्ग जुयाः सामान हयेगु लागिं ड्राइपोर्ट प्रयोगया माग यायेत्यंगु खः । उकथं हे जहाज मार्फत समुद्रया लँपु जुयाः सामान हयेगु लागिं छगू सीपोर्ट नं प्रयोगया माग यायेत्यंगु खः ।

थुकी मध्ये गुगु पोर्ट प्रयोग यात धाःसा नेपाःया सतिक लाइ व अःपुक चूलाइ धइगु खँ सहलह यानाः पोर्ट तोके याइगु खँ धाःगु दु ।
नेपाःया व्यापारीतय्सं ग्वान्जाउ व केरुङया नापसं लाःगु ड्राइपोर्टया लागिं इनाप याये माली धकाः सरकारयात प्रस्ताव याःगु दु । सरकारं थ्व खँ चीनलिसे सल्लाह यानाः जक निर्णय याये फइगु खँ धाःगु दु ।

नेपालं आः तक स्वंगूगु मुलुकं सामान हये माल धाःसा भारतया निगू बन्दरगाह प्रयोग यायेगु यानाच्वंगु दु । कोलकाता व विशाखापत्तमया बन्दरगाह जुयाः नेपालय् सामान हयेगु याइ । न्हापा थनंनिसें हे गाडीइ तयाः सामान ढुवानी याये मालीगु खःसा आः कोलकातांनिसें विराटनगरया सतिक लाःगु बर्थहवा तक भारतं रेलं सामान हये फइगु व्यवस्था याना बिउगु दु । अनंनिसें जक गाडीं हःसा गाः ।

भारतं सिबें दंक व अःपुक

चीनया लँपु जुयाः सामान हयेबलय् भारतं हयेगु स्वयां दंक व याकनं जुइगु खँ व्यापारीतय्सं धाःगु दु । थौंकन्हय् नेपालं भारतया कोलकाता व विशाखापत्तम बन्दरगाहपाखें सामान हयेगु यानाच्वंगु दु । थनं सामान हयेबलय् लछि निसें निला तकया ई काः । अले थ्व बन्दरगाह तसकं भीडभाड जुइगु कारणं नेपाःया व्यापारीतय्त तसकं थाकुसे नं च्वं । सामान जक छुटे यायेत नं लछि धइथें बिउ । थुकिं यानाः अप्वः डिमेरज पुले मालीगु नं समस्या दु । आः कोलकातां बर्थहवा तक रेलं सामान हये फइगु सुविधा भारतं बिउसां अनं धाःसा ६ घन्टाया दुने सामान लोड यानाः नेपाः हये हे माःगु व्यवस्था याःगुलिं थुकिं नं नेपाःमितय्त समस्या जुयाच्वंगु खँ धाःगु दु । उकिं चीनया लँपु सहज जुइगु आशा जुयाच्वंगु दु ।