‘कमलपोखरीया आकार न्हापा स्वयां तःधं जुइ’
येँ – येँया वडा नं. १ स्थित कमलपोखरी पुनर्निर्माणया विरोध यासें उगु क्षेत्रया पूर्व सांसद गगन थापां छ्वया हःगु पौ थःगु ल्हातय् लाये न्ह्यः हे पत्रिकाय् निं पिहां वःगु खँ येँ मनपाया मेयर विद्यासुन्दर शाक्यं कनादीगु दु । अथे हे कमलपोखरीइ जुयाच्वंगु ज्या स्थगित या धकाः पुरातत्व विभागं मनपायात पौ च्वल धाःगु खँ नं थम्हं पत्रिकाय् ब्वनाः तिनि सिउगु व उगु पौ आः तक मनपाय् मवःनिगु जानकारी नं वय्कलं बियादीगु दु ।
म्हिगः जूगु येँ मनपा नगरसभाया च्याक्वःगु अधिवेशनय् न्ववासें मेयर शाक्यं उगु खँ कनादीगु खः । वय्कलं धयादिल, ‘छगू सरकारी निकायं मेगु सरकारी निकाययात छ्वःगु पौ सम्बन्धित निकायय् थ्यने न्ह्यः हे पत्रिकाय् निं पिहां वःगुलिं सीदु कि थन छुं षडयन्त्र जुयाच्वंगु दु ।’
आः पुनर्निर्माण जुयाच्वंगु कमल–पोखरीया आकार चीधं जुल धकाः वःगु द्वपंयात नं खण्डन यासें वय्कलं मनपां थ्व ज्या ल्हातय् कायेधुंकाः कमलपोखरी चीधं मखु न्हापा स्वयां तःधं जुइत्यंगु दावी नं यानादिल । तःदँ न्ह्यः कमलपोखरी लागाय् सडक विस्तार याःबलय् कमलपोखरीया जग्गा नं काःगु कारणं थुकिया आधार चीधं जूवंगु खःसां अन तयातःगु प्रहरी कार्यालय दना वंगुलिं आः प्रहरीं कयातःगु ५ रोपनी जग्गा नं कमलपोखरीइ स्वाःगुलिं थुकिया आकार तःधं जुइत्यंगु खँ मेयर शाक्यं कनादिल । ‘सडक विभागं सडक तबाला याःबलय् कमलपोखरी अतिक्रमण याःगु खः, उकिया दोष महानगरपालिकायात बी दइ मखु’ वय्कलं धयादिल ।
कमलपोखरी दयेके न्ह्यः स्थानीय जनता लगायत अनया सांसद गगन थापा व नरोत्तम वैद्यलिसे तकं तःक्वः खँल्हाबल्हा जूगु व उकिया ड्रइङ डिजाइनयात सकस्यां ठीक जू धायेधुंकाः जक ज्या शुरु जूगु खँ धासें मेयर शाक्यं आः कमलपोखरीया स्थानीय जनता मखुसें पिनेयापिं मनूतय्सं वयाः थुकिया विरोध यानाच्वंगुलिं स्थानीय जनता आक्रोशित जुयाच्वंगु खँ नं कनादिल ।
कमलपोखरीया निर्माण इलय् हे सिधयेकेमाः धकाः ठेकेदारयात धया तयागु कारणं उमिसं चांन्हि मधासे ज्या यानाच्वंगु खँ कँसें वय्कलं अन निर्माण लिपा रानी पुखुली थें हे लः जायेकीगु जानकारी नं बियादिल । थुकिया बारे याकनं हे छगू पत्रकार सम्मेलन यानाः पूवंक जानकारी बीगु खँ नं कनादिल ।
अथे हे उपमेयर हरिप्रभा खड्गीं थःपिंत ज्ञापनपौ बिउ वःपिं मनूतय्त थम्हं ज्या दिके धयागु मखु, बरु थुकिया बारे मेयरलिसे खँ ल्हानाः जानकारी बी धयागु खः धयादिल ।
LEAVE YOUR COMMENTS