‘आर्थिक वृद्धिदर ८ प्रतिशतं म्हो जुइमखु’
येँ – नेपाल राष्ट्र बैंकया गभर्नर चिरञ्जिवी नेपालं चालु आर्थिक दँय् आर्थिक वृद्धिदर ८ प्रतिशतं म्हो जुइमखु धयादीगु दु । संसदया आर्थिक समितिया बैठकय् न्ववानादिसें वय्कलं आर्थिक वृद्धिदर ८ प्रतिशत हे चूलाइगु खँय् शंका मयायेत सांसदतय्त इनाप यानादीगु खः । वय्कलं लिपांगु निदँ दुने कृषि, उद्योग व सेवा क्षेत्र खनेदुगु आर्थिक वृद्धिदरया विश्लषण कथं आर्थिक वृद्धिदर ८ प्रतिशत हे जुइगु दावी यानादीगु खः ।
वय्कलं ८ प्रतिशत हे बृद्धिदर चूलाकेगु निंतिं लगानीयोग्य साधन अभिवृद्धि यायेगु, दीर्घकालिन प्रकृतिया ब्याजदर म्हो जुइगु मौद्रिक नीति न्ह्यःने हयाः बैंकं ज्या यानाच्वंगु खँ नं धयादीगु खः ।थौंकन्हय् बैंक तथा वित्तीय संस्थाया निक्षेप २,७४२ करोड थ्यनेधुंकूगु व थ्व कुल गार्हस्थ उत्पादनया ९१.२ प्रतिशत थ्यंगु खँ बैंकं धागु दु ।
बैंक तथा वित्तीय क्षेत्र संस्थां निजी क्षेत्रपाखे वाह याःगु त्यासा नं २२.५ प्रतिशतं अप्वयाः २४०० अर्ब थ्यंगु व थ्व कूल गार्हस्थ उत्पादनया ७९.८ प्रतिशत जूगु खँ धाःगु दु ।आर्थिक दँ २०७४–७५ य् कूल वस्तु आयात २५.५ प्रतिशतं अप्वया १२४२ अर्ब ८३ करोड थ्यंगु लिसें निर्यात धाःसा ८१ अर्ब १९ करोड जक थ्यंगु खः ।
कूल वस्तु व्यापारय् अझ नं दँय् घाटा ११६१ अर्ब ६४ करोड थ्यंगु दुसा विप्रेक्षणया अवस्था वार्षिक रुपं ७५५ अर्ब ६ करोड दु । वंगु दँय् ८२ अर्ब ११ करोड बचत दुगुलिं समग्र सोधान्तरण स्थिति समीक्षा दँय् ९६ करोडं जक बचत दुगु नं गभर्नर खतिवडां जानकारी बियादिल ।
बैंकिङ क्षेत्रयाके कूल विदेशी विनिमय संचित ११०२ अर्ब ५९ करोड दुगु व थ्व संचिति १०.८ महिनाया वस्तु आयात व ९.४ महिनाया वस्तु तथा सेवा आयत धाने यायेत पर्याप्त दुगु अनुमान नं राष्ट्र बंंैकं याःगु दु ।अथेहे वंगु असार मसान्त तकया दुने २८ गू वाणिज्य बैंक मध्ये २५ गूलिं व ३३ गू विकास बैंक मध्ये २१ गुलिं व २५ गू वित्त कम्पनी मध्ये ११ गुलिं तोके यानातःकथं चुक्ता पुँजी थ्यंकूगु जानकारी नं अर्थ समितियात बिउगु खः ।
ढुकुटीइ छगू खर्ब ३८ अर्बबैंक व वित्तीय संस्थाया शाखा संजाल असार मसान्त तकया दुने ६६५१ गू थ्यनेधुंकूगु व ७५३ गू मध्ये ६३७ गू स्थानीय तहय् वाणिज्य बैंक थ्यनेधुंकूगु खँ गभर्नर नेपालं जानकारी बियादीगु दु । अथेहे देय्या धुकुतिइ थौकन्हय् नगद मौज्दात १३८ अर्ब दुगु व २८ अर्ब तका बराबरया लुँवह दुगु खँ नं धाःगु दु ।
LEAVE YOUR COMMENTS