प्रदेश २ नां मतदानं हे क्वःछीगु

येँ – प्रदेश नम्बर २ या स्थायी राजधानी व नांयात कयाः सहमति मजुइवं आः मतदानपाखें हे निर्णय याइगु जूगु दु । नां व राजधानीयात कयाः वइगु फागुन २३ गते मतदान यायेगु कथं तयारी जुयाच्वंगु दु । फागुन २२ गते च्वनीगु प्रदेशसभा बैठकय् नां व स्थायी
राजधानीयात कयाः सदनयात जानकारी याकेधुंकाः कन्हय् कुन्हु मतदान यायेगु तयारी जुयाच्वंगु खँ प्रदेशसभा सचिवालयं धाःगु दु ।

वंगु स्वला न्ह्यवंनिसे अवरुद्ध जुयाच्वंगु प्रदेशसभा बैठक २२ गते सःतातःगु दु । २२ गते च्वनीगु बैठकय् प्रदेशया नां व राजधानी क्वःछीगु प्रक्रियाया कार्यसूची बारे सदनयात जानकारी याकेगु खँ सभामुख सरोजकुमार यादवं कनादीगु दु ।

वय्कःया कथं कार्यसूची बारे सदनयात जानकारी याकेधुंकाः फागुन २३ गते सुथय् ८ बजे प्रदेशया नां व राजधानीयात कयाः मतदान प्रक्रिया न्ह्याइ । प्रदेशया नांया निंतिं प्यंगू व राजधानीया निंतिं स्वंगू प्रस्ताव दर्ता जुयाच्वंगु दु । फुक्कं प्रस्तावयात कयाः सहलह यायेधुंकाःलि निगू तिहाइ बहुमतं नां व स्थायी राजधानीया प्रस्ताव पारित याइगु खँ धाःगु दु ।

सत्तारुढ दल समाजवादी पार्टी व राष्ट्रिय जनता पार्टी (राजपां) प्रदेशया नां ‘मधेश प्रदेश’ तयेगु प्रस्ताव यानातःगु दुसा प्रमुख विपक्षी दल नेपाल कम्युनिष्ट पार्टी (नेकपां) ‘जानकी’ व नेपाली कांग्रेसं ‘मिथिला–भोजपुरा’ प्रस्ताव यानातःगु दु ।