विघटन विरुद्ध नागरिक समाज नं खुले जुल, ओलीया पक्षय् कार्यकर्ता जक

येँ (नेपालभाषा टाइम्स) – सर्वोच्च अदालतया पुलांपिं न्यायाधीश लिपा आः नागरिक समाजया न्ह्यलुवापिं नं प्रधानमन्त्री केपी ओली विरुद्ध खुले जूगु दु । म्हिगः नागरिक समाजया न्ह्यलुवापिं डा. देवेन्द्रराज पाण्डे व कृष्ण पहाडीं छगू मंकाः वक्तव्य पिकासें म ओलीं संसद विघटनया सिफारिस याःगु संविधानसम्मत मजू धइगु धापू सार्वजनिक याःगु खः । पहाडी थ्व स्वयां न्ह्यः हे विघटनया विरोधय् कुहां वयेधुंकूम्ह खःसा डा. पाण्डे म्हिगः तिनि खुले जुयादीगु खः । देशय् २०४६ साल व २०६२ सालया राजनीतिक हिउपाः हयेगु आन्दोलनय् वय्कःपिनि महत्वपूर्ण योगदान दु ।

थ्व स्वयां न्ह्यः सर्वोच्च अदालतया प्यम्ह पुलांपिं प्रधानन्यायाधीशतय्सं प्रम ओलीं यानादीगु संसद विघटन विरुद्ध वक्तव्य बियादीगु खः । पुलांपिं प्रधानन्यायाधीशतय्गु मंकाः वक्तव्य विरुद्ध स्वयम् प्रधानमन्त्री ओली लगायत वय्कःया राजनीतिक सल्लाहकार व प्रेस सल्लाहकारं आलोचना यानादीगु खः।

ओलीया संसद विघटन ज्या विरुद्ध थ्व स्वयां न्ह्यः देय्या सञ्चार ख्यः लिसें कलाकार, साहित्यकार व न्यायिक ख्यः खुलेजुयाः कुहां वयेधुंकूगु दु । गुगुं पार्टी मलिउपिं कलाकारतय्सं न्हिंन्हिं सतकय् वयाः रचनात्मक ज्याखँ यासें विरोध प्रदर्शन यानाच्वंगु दुसा साहित्यकारतय्सं नं साहित्य रचना मार्फत ओलीया पलाःयात विरोध यानाच्वंगु दु । न्यायिक ख्यःया आपालं वरिष्ठ वकिलतय्सं विघटन विरुद्ध लगातार बिचाः तयेगु याना हःसां सत्ता पक्षया सुं नं वकिलं आः तक खुले जुयाः थःगु बिचाः तःगु मदुनि ।

लुमंकेबहः जू, छुं ई न्ह्यः तिनि संघीयता लागिं संघर्ष यानाच्वंपिं १६ म्ह नेवाः न्ह्यलुवातय्सं नं ओलीया पलाः विरुद्ध वक्तव्य जारी याःगु खः । थुकथं सत्तां पिनेया थीथी ख्यः थ्व इलय् प्रम ओलीया पलाः विरुद्ध छगू लिपा मेगु खुले जुयाः पिहां वयाच्वंगु दु। तर ओलीया पक्षय् धाःसा स्वयम् वय्कःया हे पार्टीया कार्यकर्ता बाहेक मेपिं सुं खुले जूगु मदुनि । वय्कःया थःगु हे पार्टी दुने नं वय्कःयात साथ बीपिं सुवास नेम्बाङ, अग्नी खरेल थेंज्याःपिं नेतात आः तक विघटनया पक्षय् खुले जुयाः दं वःगु मदुनि । उकिं थ्व इलय् संसद विघटनया पक्षय् ओलीया थःगु हे कार्यकर्ताया छगू चीधंगु घेरा जक ल्यं दुगु विश्लेषण पिने याना हःगु दु ।

देय्या बुद्धिजीवी व नागरिक समाज नं धमाधम विघटन विरुद्ध खुले जुजुं वःगुलिं प्रम ओली याकःचा जुजुं वनाच्वंगु अनुभव याना हःगु दु । पिने जुयाच्वंगु थुकथंया गतिविधिं यानाः आः सर्वोच्च अदालत नं संविधान स्वयां पिहां वनेत थाकुइगु अनुमान याना हःगु दु ।