ने. सं. ११४१ कौलागा पञ्चमी

संसद भंग फुलबेञ्चय् वनीगु सम्भावना

येँ (नेपालभाषा टाइम्स) – प्रधानमन्त्री केपी ओलीं याःगु संसद विघटनया ज्या संवैधानिक खः वा मखु धइगु बारे सर्वोच्च अदालतय् जुयाच्वंगु मुद्दायात आः सर्वोच्चया फुलबेञ्चय् यंकेगु बारे खँल्हाबल्हा जुयाच्वंगु खँ सीदुगु दु । थौंकन्हय् थ्व मुद्दा सर्वोच्चया संवैधानिक अदालतं स्वयेगु यानाच्वंगु दु । संवैधानिक अदालतय् ओली पक्षया बहुमत दुगु कारणं अनं वइगु फैसला पक्षपाती जुइ फइगु खँयात ध्यानय् तयाः थुकियात फुलबेञ्चय् यंकेमाःगु सः थ्वयाच्वंगु खः । विज्ञ सूत्रं धाः कथं थ्व मुद्दायात आः फुलबेञ्चय् यंके माली धइगु खँय् सर्वोच्चया न्यायाधीशतय् दथुइ खँल्हाबल्हा जुयाच्वंगु दुसा बारं छ्वया हइगु एमिकश क्युरीं नं सर्वोच्चयात थ्वहे सुझाव बीगु सम्भावना दुगु खँ धाःगु दु ।

संवैधानिक अदालतय् न्याम्ह दुजः दुसा उकी मध्ये प्रधानन्यायाधीश लगायत मेपिं निम्ह दुजः ओलीया पक्षय् दुगु खँ पिहां वयाच्वंगु दु । फुलबेञ्चय्यं कल धाःसा थ्व मुद्दा ११ म्ह न्यायाधीशतय्सं स्वयेगु याइ । ११ म्ह न्यायाधीशय् संसद विघटन पाय्छि धाइपिं न्यायाधीशत म्हो जक जुइगु खँ धाःगु दु। नापं अन सु सु न्यायाधीश लाइ धकाः आः हे धाये फइगु अवस्था नं जुइ मखु ।

सूत्रतय्सं धाःकथं थ्व मुद्दायात यदि सर्वोच्चया फुलबेञ्चय् यंकल धाःसा प्रम ओलीं म्हितूगु राजनीतिक खेल अःखः जुइ फइगु यक्व सम्भावना दु । छुं न्हि न्ह्यः तिनि निर्वाचन आयोगं नं दल व चुनाव चिं सम्बन्धी विवाद बारे चुनाव घोषणा जुइधुंकूसां नं आयोगं छलफल यानाः निर्णय याये फइ धकाः थःपिनि नियम संशोधन याःगु खः गुगु प्रम ओलीया लागिं हितकर मजुइगु विश्लेषण याना हयाच्वंगु दु ।