आः निर्वाचन सुनानं दिके मफइगु आयोगया दावी
येँ (नेपालभाषा टाइम्स)- प्रमुख निर्वाचन आयुक्त दिनेश थपलियां निर्वाचनया रकेट प्रक्षेपण जुइधुंकूगु अवस्थाय् उकियात पने मफइगु खँ धयादीगु दु । म्हिगः निर्वाचन आयोगं विराटनगरय् ग्वसाः ग्वःगु छगू ज्याझ्वलय् न्ववासें वय्कलं उगु खँ धयादीगु दु ।
वय्कलं प्रक्षेपण जुइधुंकूगु रकेट पनेत स्वल धाःसा दुर्घटना जुइफइगु जूगुलिं निर्वाचन दिकाः दुर्घटना सःतेगु अवस्थाय् आयोग मदुगु खँ नं धयादिल ।
प्रमुख निर्वाचन आयुक्त थपलियां निर्वाचन मजुल धाःसा लोकतन्त्र हे पराजित जुइफु धासें धयादिल, ‘निर्वाचन जुइत सुइछन्हु जक ल्यं दनि, सुइगू जिल्लाया मतपत्र छापे यानाः छ्वयेगु झ्वलय् दु, निर्वाचन अधिकृतपिं नियुक्त यानाः कार्यालय स्थापना यायेगु तयारी जुयाच्वंगु दु ।’
उकथं हे प्रमुख निर्वाचन आयुक्त थपलियां कांग्रेस केन्द्रीय दुजः शशांक कोइरालां निर्वाचनय् ६ करोड खर्च जूगु धकाः बिउगु अभिव्यक्ति निर्वाचन आचार संहिता अःखः जूगुलिं पौ च्वयाः प्रष्ट यायेत इनाप यानागु खँ नं धयादिल ।
उकथं हे वय्कलं सामाजिक सञ्जालपाखें निर्वाचन प्रभावित याइगु भ्रामक, तथ्यहीन सुचं व अपमानजनक गतिविधि नियमन यायेगु संरचना क्रियाशील जुइधुंकूगु खँ नं कनादिल । वय्कलं आःया स्थानीय निर्वाचन न्ह्याथेयानाः नं त्याकेफइ धइगु भ्रम स्थापित जुइगु खः कि धकाः हे आचार संहिता लागू यानागु खँ धयादीगु दु ।
थ्वहे झ्वलय् निर्वाचन आयोगं दलतय्सं छगू जक पदय् उम्मेदवारी बिल धाःसा उम्ह उम्मेदवार अनिवार्य रुपं मिसाम्ह जुइमाः धकाः थ्व स्वयां न्ह्यः दयेकूगु प्रावधानयात संशोधन याःगु दु । दलतय्सं थ्व प्रावधानयात कयाः आपत्ति प्वंकेवं उकियात भिंकुसें मिसापिंत प्राथमिकता जक बिउसा गाःगु व्यवस्था याःगु दु ।
आयोगया प्रवक्ता शालीग्राम शर्मा पौडेलं म्हिगः जारी याःगु विज्ञप्तिइ धयातःगु दु, ‘निर्वाचन आयोगं मिति २०७८ चैत २२ गते राजनीतिक दलतय्त निर्वाचन व्यवस्थापनयात लैंगिक व समावेशीमैत्री दयेकेगु सम्बन्धय् बियागु निर्देशनया बुँदा नम्बर ६ स ‘स्थानीय तहया प्रमुख व उपप्रमुख वा अध्यक्ष व उपाध्यक्षया पद मध्ये गुंगू छगू पदय् जक उम्मेदवारी बीगु राजनीतिक दलं मिसा उम्मेदवार मनोनयनय् प्राथमिकता बीगु धइगु जुइमाःथाय् मेकथं जूगुलिं भिंकूगु दु ।’
LEAVE YOUR COMMENTS