नागरिकता विधेयक प्रमाणित, एमाले व रास्वपाया विरोध, मेपिंपाखें लसकुस
येँ (नेपालभाषा टाइम्स)÷पुलांम्ह राष्ट्रपति विद्यादेवी भण्डारीं प्रमाणित मयासे पनातःगु नागरिकता सम्बन्धी विधेयक राष्ट्रपति रामचन्द्र पौडेलं म्हिगः प्रमाणीकरण यानादीगु दु ।
संसदया निगुलिं सदनं पारित याःगु नागरिकता विधेयक २०७९ साउन १६ गते तत्कालीन राष्ट्रपति भण्डारीयाथाय् प्रमाणीकरणया नितिं छ्वःगु खः । तर भण्डारीं च्यागू बुँदाया सरोकार सहित संसदय् तुं लित छ्वया बिल । वयां लिपा निगुलिं सदनं विधेयकयात हानं न्हापा गथे खः अथे हे पारित यायेत भदौ २० गते राष्ट्रपतियाथाय् छ्वःगु खः । तर राष्ट्रपति भण्डारी झिंन्यान्हुया दुने पारित यायेमाःगु विधेयक थाति तयाबिउगु खः । उगु हे विधेयक राष्ट्रपति पौडेलं म्हिगः प्रमाणीकरण याःगु खः ।
नागरिकता विधेयक प्रमाणित जुइवं कार्यान्वयनया लँपु चाःगु दु । विधेयक प्रमाणीकरण लिपा आः नेपालय् च्वनाः नं नागरिकता काये मखनाच्वंपिं लखौं नेपाःमितय्सं नागरिकता काये खनीगु जूगु दु ।
२०७२ या संविधान वये न्ह्यः जन्मया आधारय् नागरिकता कयातःपिनि सन्तानं आः वंशजया आधारय् नागरिकता काये दइ । अथे हे थ्व विधेयकया मेगु व्यवस्था कथं मांया नामं नं नागरिकता काये दइगु जूगु दु । नेपाःमि मांपाखें जन्म जुयाः नेपालय् च्वनाच्वंम्ह तर अबुया म्हसीका मदुम्ह मनुखं आः मांया नामं नागरिकता काये दइगु जूगु दु । तर अबु विदेशी जूगु प्रमाणित जुल धाःसा वंशजया आधारय् काःगु नागरिकता अंगिकृत नागरिकताय् परिवर्तन जुइ धयातःगु दु । लिसें आः गैरआवासीय नेपाःमियात नं नागरिकता कायेगु लँपु चाःगु दु । तर उमिसं राजनीतिक व प्रशासनिक अधिकार धाःसा छ्यले दइ मखु ।
उकथं हे विधेयक प्रमाणीकरण जुइधुंकाः नेपाःमि मिजंनाप इहिपा याना वइम्ह विदेशी मिसां तत्काल अंगीकृत नागरिकता काये खनी । राष्ट्रपतिं नागरिकता विधेयक प्रमाणीकरण यायेवं एमालेया समर्थित अखिल व युवा संघं म्हिगः हे शितल निवास न्ह्यःने प्रदर्शन याःगु दु । प्रदर्शन याःपिं १९ म्हेसित ज्वना यंकूगु दु । एमाले लिसें रास्वपां प्रमाणीकरणया विरोध याःगु दु ।
जनमत पार्टी व लोसपां धाःसा राष्ट्रपतिं याःगु प्रमाणीकरणयात लसकुस याःगु दु । उमिसं थुकिया लागिं राष्ट्रपतियात सुभायय् नं देछाःगु दु ।
LEAVE YOUR COMMENTS