निगुलिं पार्टीयात आयोगया पौ

येँ (नेपालभाषा टाइम्स) -निर्वाचन आयोगं केपी शर्मा ओली व माधव नेपाल पुचःया निगुलिं कम्युनिष्ट पार्टीयात थःगु पार्टीया आधिकारिता दावी याः वयेगु लागिं पौ च्वयाः छ्वःगु दु । निगू पार्टीयात छ्वःगु पौया विवरण धाःसा छुं भचा पानाच्वंगु खँ धाःगु दु । नेपाल पुचःयात छ्वःगु पती थःगु दावी सहितया सामग्री ज्वनाः ७ न्हुया दुने स्वापू तयेत इनाप यानातःगु दुसा ओली पुचःयात छ्वःगु पती अज्याःगु म्याद बियातःगु मदु । ओलीयात छ्वःगु पती दलया आधिकारिता सम्बन्धी विवाद वल धाःसा अज्याःगु विवाद निर्वाचन आयोगपाखें निरुपण याइ धइगु व्यहोरो न्ह्यथनातःगु दुसा नेपाल पुचःयात छ्वःगु पती दल व चुनाव चिंया आधिकारिता दलया केन्द्रीय दुजःतय् बहुमतया आधारय् वनी धइगु जानकारी बिसें उकिया लागिं ७ न्हुया दुने स्वापू तयाः ग्वाहालि यानादिसँ धयातःगु दु ।