‘कोरोनाया महामारीं विकासया अवधारणाय् पुनरावलोकनया माग याःगु दु’

येँ – नेवाः न्ह्यलुवाः नापं नेपाल राष्ट्र बैंकया पुलाम्ह डेपुटी गर्भनर डा. पुष्पराज राजकर्णिकारं कोरोनाया महामारीं विकासया अवधारणय् नं पुनरावलोकनया माग याःगु खँ धयादीगु दु ।

कारोना भाइरसाया काराणं आपलं मनूत देश विदेशं छेँ लिहांवयाच्वंगु व अज्याःगु झ्वः अझ अप्वइगु खँ धयादिसें डा. राजकर्णिकारं थज्याःगु जनशक्तियात व्यवस्थित यायेगु निंतिं राजेगारीया अवसरया विकास यायेमाःगु बिचाः तयादी । तर अज्याःगु विकास शहर केन्द्रित मजुसें गाँ केन्द्रित जुइमाःगु खँय् बः बियादी ।

‘शहर केन्द्रित विकास मखु गाँमुखी व आधारभूत वस्तुइ आत्मनिर्भर विकास आःया आवश्यकता खः ।’ वय्कलं धयादिल ।

देश विदेशं वयाच्वंगु श्रम शक्तियात रोजगारी बीगु निंतिं गाँमय् कृषि व घरेलु तथा साना उद्योगत विकास यायेगु धयादिसें वय्कलं गाँमय् अज्याःगु उद्योगत विकास यायेधुंकाः उत्पादित वस्तुतय् बजाःया निंतिं ग्रामीण श्रेत्रय् शहर विकास यायेमाःगु बिचाः नं प्वंकादिल ।

थ्वहे झ्वलय् छुं न्हि न्ह्यः जक सरकरं हःगु नीति तथा कार्यक्रमय् स्वनिगः दुने प्यंगू न्हूगु उपशहर दयेकेगु धकाः दुथ्याकातःगु ज्याझ्वःया नं वय्कलं विरोध यानादिल । ‘नीति तथा कार्यक्रमय् प्यंगू उपशहर निर्माण यायेगु विवादास्पद ज्याझ्वः नं दुथ्याकातःगु दु,’ वय्कलं धयादिल, ‘थ्व अनावश्यक व वर्तमान परिस्थितिपाखें असान्दर्भिक जुइधुंकल ।’

स्रोतया संकट जूगु अवस्थाय् थज्याःगु ज्याझ्वः सरकारया नीति तथा कार्यक्रमय् मलयेमाःगु खँ न्ह्यथनादिसें वय्कलं थुगु ज्याझ्वः सरकारं दुथ्याकातःगु भूउपयोग नीति व हरित स्वनिगःया नीति अःख जूगु नं धयादिल ।

थुकीया बारे थःगु बिचाः न्ह्यब्वयादिसें धयादी, ‘स्रोता अभाव जूगु इलय् शहरया दुने शहर दयेकेगुया औचित्य मदु उकीं न्हूगु शहर स्रोत दुगु गाँमय् दयेकेमाः ।’