ने. सं. ११४४ कछलागा द्वादशी -

नेपाः बारे चीन-भारत वाक्युद्ध : नेपाः समक्ष चीनं निगू विकल्प त्वःता थकूगु भारतया दावी

येँ (नेपालभाषा टाइम्स) – नेपालय् विकसित राजनीतिक अवस्थायात कयाः जःलाखःला देय् भारत व चीन दथुइ वाक्युद्ध शुरु जूगु दु । नेकपा कुचा जुइगु जुइवं नेपाः ब्वाँय् वःगु चिनियाँ कम्युनिष्ट पार्टी विदेश मामिला विभागया उपमन्त्री गुओ येचौया पुचलं थन याःगु भेटवार्तायात भारतं ‘नेपाःया आन्तरिक मामिलाय् हस्तक्षेप’ धकाः द्वपं बिउगु दुसा चीनं थुकियात हस्तक्षेप मखु भाइचारा स्वापू धकाः लिसः बियाहःगु दु । थ्व ज्यायात निगू कम्युनिष्ट पार्टीया थवंथवय्या मामिला खः धासें चिनियाँ विदेश मन्त्रालया प्रवक्ता झाओ लिजियानं थुकी भारतं कपाः स्याकेमाःगु आवश्यकता मदु धाःगु दु ।

चीनं कोरोना महामारी पनेगु बारे खँ ल्हायेगु लागिं चिनियाँ पुचः नेपाः वंगु खः धकाः नं स्पष्टीकरण बिउगु दु । चिनियाँ विज्ञ लिन मिनवाबं भारतं बरु नेपाःया आन्तरिक मामिलाय् न्हापांनिसें हस्तक्षेप याना वयाच्वंगु द्वपं बिसें नेपालय् चीनपाखें तःधंगु लगानी यानातःगु जूगुलिं अन जुइगु छुं नं कथंया उथलपुथलय् चिउताः तइगु स्वाभाविक खः धयाहःगु दु ।

थ्वहे झ्वलय् भारतीय सञ्चार माध्यमतय्सं नेपाः वःगु चिनियाँ पुचलं नेपाःया नेतात नापलासें पार्टी बचे यायेत निगू विकल्प न्ह्यःने तःगु खँ च्वया हःगु दु । चीनं न्ह्यःने तःगु निगू विकल्प मध्ये छगू खः- संसद पुनर्स्थापना जुल धाःसा निगू पार्टी मिले जुइगु अले केपी ओलीया थासय् मेम्हेसित प्रधानमन्त्री दयेकाः न्ह्याः वनेगु । अथे हे मेगु खः- छुं जुयाः चुनावय् वने माल धाःसा सकलें वामपन्थी पार्टीत छप्पँ जुयाः चुनाव ल्वायेगु ।

नेपाःया नेतातलिसे जूगु गोप्य वार्ताय् चीनं न्ह्यथंगु थ्व खँ भारतीय पत्रपत्रिकाय् पिहां वयेधुंकूगु दु । नापं उकिया हे लिधंसाय् नेपाःया लागिं भारतया पुलांम्ह राजदूत श्यामशरणं भारतं पिहां वइगु ‘द ट्रिब्युन’ पत्रिकाय् छपु च्वसु च्वसें चीनं नेपालय् ओलीया थासय् मेम्हेसित प्रधानमन्त्री दयेकेगु खेल म्हिताच्वंगु दु धकाः दावी समेत याना हयेधुंकूगु दु ।

नेपाःया नेतात नापलानाः म्हिगः लिहां वंगु चिनियाँ पुचलं प्रमुख प्रतिपक्षी नेपाली कांग्रेसया सभापति शेरबहादुर देउवायात नं नापलाःगु खः । देउवायात नापलानाः पुचलं आकिवं जुइगु चिनियाँ कम्युनिष्ट पार्टीया १०० दँ बुन्हि ज्याझ्वलय् ब्वति कायेत राष्ट्रपति सी जिनपिनं छ्वया हःगु ब्वनापौ नं लःल्हाःगु दु । नेकपाया नेतातय्त अज्याःगु ब्वनापौ बिउगु मदु । भारतीय मिडियां धाःसा आः जुइगु चुनावय् नेपाली कांग्रेस तःधंगु पार्टी जुयाः उदय जुइ फइगु जुयाः थ्वलिसे स्वापू बांलाका तयेमाः धकाः आवंनिसें हे तयारी यायेत नं चीन वयेत ब्वनापौ बिउगु धकाः च्वया हःगु दु । नेकपा एकीकृत जूगु इलय् नं गुओ येचौ नेपाः वःगु खः ।