थौं यःमरि पुन्हि लिसें १७ क्वःगु ज्यापु दिवस

येँ (नेपालभाषा टाइम्स) – थौं यःमरि पुन्हि । यःमरि पुन्हिया लसताय् थौं नेवाःतय् छेँय् छेँय् जाकिचुंया यःमरि दयेकाः नयेगु याइ । नापं थौं ‘त्यःछिंत्यः बकंछि त्यः…’ म्ये हालाः यःमरि फ्वं वनेगु नं चलन दु । थौंकन्हय् धाःसा थ्व चलन म्हो जुया वनेधुंकल । मेखे थौंया हे दिनय् ज्यापु समुदायं ज्यापु दिवस नं न्यायेकेगु याइ । थ्व झ्वलय् थौं १७ क्वःगु ज्यापु दिवस न्यायेकाच्वंगु दु। थुगुसी कोरोना महामारीया कारणं सार्वजनिक ज्याझ्वः मयासे राष्ट्रिय नाचघरय् सीमित मनूतय् दथुइ ज्यापु दिवस न्यायेकेत्यंगु दु । ज्यापु दिवसया लसताय् थुगुसी न्हूदँ समारोह समिति-११४१ या नायः लिसें हिरा व्यवसायी रमेश महर्जनयात ‘ज्यापु रत्न’ सम्मान लःल्हासें हनीगु जूगु दु ।