म्येँ हालामि रमेश ताम्राकार मन्त

नांजाःम्ह म्येँ हालामि रमेश ताम्राकार मन्त । वय्कः म्हिगः बहनी १२ बजे पाखे आकाझाकां मदुगु खः । वय्कःया सीम्ह टिचिङ अस्पतालय् तयातःगु दु ।

वने त्यल जि ला थौं कलाःया थःछेँय्…., छगः निगः स्वंगः माखाया भाःत ग्वंगः…., थौं वइला कन्हय् वइला थेंज्याःगु नेपालभाषाया कालजयी म्येँ हालादीम्ह वय्कः नेपालभाषा ख्यःया तसकं लोकंह्वाःम्ह म्येँ हालामी खः । वय्कलं थःगु पुलांगु म्येँया रिमिक्स यानाः ककटेल पञ्चक्वाः धकाः म्येचा नं पिकयादीगु दु ।

वय्कः नेपाली संगीत ख्यलय् नं नांजाःम्ह खःसा राष्ट्रिय नाचघरय् महाप्रबन्धक नं जुयादीधुंकूम्ह खः ।

वय्कःया काय व जहान देशं पिने दुगुलिं वय्कःपिं लिहां वयेधुंकाः जक अन्त्येष्टी याइगु खँ धाःगु दु ।