‘पुनर्स्थापना नं जुइ मखु, चुनाव नं जुइ मखु’

येँ (नेपालभाषा टाइम्स) – जनता समाजवादी पार्टी संघीय परिषदया अध्यक्ष डा. बाबुराम भट्टराईं प्रधानमन्त्री ओलीया नेतृत्वय् चुनाव जुइ मफइगु खँ धयादीगु दु । म्हिगः संसद विघटन विरुद्ध येँय् जूगु विरोध ज्याझ्वःयात सम्बोधन यासें भट्टराईं उगु खँ धयादीगु खः । वय्कलं धयादी, ‘प्रम ओलीं चुनाव याकी व थः तःधंगु दल जुइफइ धइगु भ्रमं कांग्रेस मुक्त जुइमाः ।’

वय्कलं प्रधानमन्त्री ओलीया ध्यान निरंकुशपाखे न्ह्यानाच्वंगु धासें चुनाव याकी धइगु खँय् विश्वास मयायेत इनाप यानादिल । ‘चुनाव जुइ व चुनावय् वनेधुंकाः कांग्रेस तःधंगु पार्टी जुइ व सरकार चले याये धइगु भ्रमय् मच्वने, असंवैधानिक पलाःया विरोध याये’ वय्कलं धयादिल ।

वय्कलं संविधानया भावना कथं अदालतं संसद विघटनयात अस्वीकार यायेफइगु खँय् आशंका प्वंकुसें सत्य व न्यायया पक्षय् अदालतया फैसला वयेत थाकुइगु बिचाः तयादिल । वय्कलं धयादिल, ‘संविधान दयेकूगु झ्वलय् जिं संवैधानिक अदालत दयेकेगु प्रस्ताव तयागु खः । उकियात अस्वीकार याःगुलिं आः अदालतयात विश्वास यायेफइगु अवस्था मदु ।’

सम्बन्धित बुखँ

LEAVE YOUR COMMENTS