ने. सं. ११४४ कौलाथ्व पारू - नःलास्वनेगु

स्वांया पुन्हि कुन्हु अस्थिधातु दर्शन मयाकीगु

छेँय् छेँय् बुद्ध पुजा यानाः स्वांया पुन्हि हनेत आह्वान

येँ – थुगुसी स्वांया पुन्हि (बुद्ध जयन्ती)या लसताय् छुं नं सार्वजनिक ज्याझ्वः मजुइगु जूगु दु । बुद्ध जयन्तीया लसताय् दँय्दँसं स्वयम्भुया आनन्दकुटी विहारय् बुद्धया अस्थिधातुया सार्वजनिक प्रदर्शन जुइगु ज्या नं मजुइगु जूगु दु ।

बुद्ध जयन्ती समारोह समितिया नायः भिक्षु मैत्री छुं न्हि न्ह्यव हे छगू वक्तव्य जारी यासें स्वांया पुन्हिया लसताय् छवाःयंकं हनीगु ज्याझ्वः थुगुसी कोभिड १९ या पनेत सरकारं यानातःगु लकडाउनया कारणं हनेमफइगु खँ धयाबिज्याःगु खः । वसपोलं सार्वजनिक रुपं ज्याझ्वः याये मफइगु जूसां थःथःगु छेँय्, विहार विहारय् बुद्ध पुजा यानाः, मत च्याकाः स्वांया पुन्हि हनेत नं आह्वान यानाबिज्याःगु दु ।

स्वांया पुन्हि कुन्हु आनन्दकुटी विहारय् अस्थिधातुया सार्वजनिक प्रदर्शन वि.सं. २००५ निसें हे याना वयाच्वंगु खः । वि.सं. २००१ य् श्रीलंकाया भिक्षु नारद महास्थविरया नेतृत्वय् वःगु छगू प्रतिनिधिमण्डलं तत्कालिन श्री ३ महाराजाधिराज पद्म शम्शेर राणायात थ्व अस्थिधातु उपहार स्वरुप बिउगु खः । थुगु अस्थिधातुयात आनन्दकुटी विहारय् श्री लंकाराम चैत्य निर्माण यानाः उकिया गर्भ दुने तयातःगु खः । वि.सं. २००५ य् पद्म शम्शेरं थुगु विहारया उलेज्या यासें दँय्दसं अस्थिधातु सार्वजनिक प्रदर्शन यायेगु व्यवस्था याःगु खः । उबलय् निसें हे पद्म शम्शेरं स्वांया पुन्हि कुन्हु सार्वजनिक बिदा बीगु घोषणा यानाथकूगु खः ।

उबलय् निसें दँय्दसं सरकार प्रमुखयात मू पाहाँय यानाः आनन्दकुटी विहारय् निमन्त्रण यानाः सार्वजनिक प्रदर्शन याना वयाच्वंगु खःसा थुगुसी अस्थिधातु मक्यनीगु जूगु खः । अस्थिधातु स्वदँय् छक्वः देय् चाःहिकेगु नं याना वयाच्वंगु खःसा थुगुसी धाःसा देय्चाःहिकेगु दिं मलाःगु खँ समितिया उपाध्यक्ष संघरत्न शाक्यं कनादीगु दु ।

अथेहे यलय् नं थुगुसी स्वांया पुन्हि कुन्हु देचाःहिलेगु ज्या मजुइगु जूगु दु । थुगुसी स्वांया पुन्हि कुन्हु रुद्रवर्ण महाविहारय् म्हो जक मनू मुनाः स्वांया पुन्हि हनेगु २५६४ औं बु्द्ध जयन्ती समारोह समिति श्री रुद्रवर्ण महाविहारया कार्यसमितिं क्वःछिउगु दु ।

स्वांया पुन्हिया लसताय् लुम्बिनी जुइ धयातःगु अन्तर्राष्ट्रिय बौद्ध सम्मेलन नं स्थगित जुइधुंकूगु दु ।