आपालं नेवाः कार्यकर्ता जुल केन्द्रीय दुजः

येँ (नेपालभाषा टाइम्स) – पार्टी विभाजन लिपा केपी ओली पक्षीय नेपाल कम्युनिष्ट पार्टीं न्हू थपे याःपिं केन्द्रीय दुजःया धलखय् स्वनिगःया आपालं नेवाः कार्यकर्तात नं दुथ्याःगु दु। थुकी येँ महानगरपालिकाया मेयर विद्यासुन्दर शाक्य लिसें शम्भुराम महर्जन ‘मान्छे’, केशव स्थापित, शिवराज वैद्य, बुद्धभक्त चित्रकार, सानुराजा शाक्य, शरब महर्जन, केशरत्न वज्राचार्य, विन्दु महर्जन, न्हुछेकाजी महर्जन, सरस्वती बाटी, राजेन्द्र राजथला, रामबहादुर श्रेष्ठ, रामेश्वर श्रेष्ठ, हरिकृष्ण व्यंजनकार, बाबुलाल डंगोल, शान्ति श्रेष्ठ, मधु सुदन तण्डुकार, श्यामलाल तण्डुकार, राजेन्द्रमान श्रेष्ठ आदिपिं दुथ्यानाच्वंगु दु ।

पार्टीया उपत्यका कमिटीया संयोजक लिसें शहरी विकास मन्त्री कृष्णगोपाल श्रेष्ठं ‘नेपालभाषा टाइम्स’ यात कनादीकथं आः पार्टीपाखें याकनं हे स्वनिगःया सकलें कार्यकर्ता मुंकाः बृहत् भेला यायेत्यंगु दु । लिसें क्षेत्रीय भेला नं याना वनेगु व वयां लिपा वडास्तरय् थ्यंकं कमिटी पुनर्गठन यायेगु तयारी जुयाच्वंगु दु । थुलि ज्या क्वचाल कि पार्टीपाखें जनस्तरय् वयाः तःधंगु सभा यायेगु ग्वसाः जुयाच्वंगु दु ।