‘आः प्रत्यक्ष राष्ट्रपति प्रणाली लागू यायेमाः’

येँ (नेपालभाषा टाइम्स) – राष्ट्रपति विद्यादेवी भण्डारीं संसद विघटन याःगु धाःसां नं संविधान कथं संसद विघटन मजूनिगु खँ संघीय समाजवादी पार्टीया कार्यकारिणी दुजः राजेन्द्र श्रेष्ठं धयादीगु दु । प्रधानमन्त्री ओलीं संसद विघटन याःगु विरोधय् म्हिगः थनया थाय्मदुइ जूगु सभाय् न्ववासें वय्कलं उगु खँ धयादीगु खः ।

अथे हे वय्कलं आःया सभामुख अग्नीप्रसाद सापकोटां संसदयात निरन्तरता बीमाःगु माग यासें संविधानया अःखः प्रधानमन्त्रीं संसद विघटन याःगुलिं अज्याःगु बैठक सःतेमाःगु खँ धयादीगु खः । वय्कलं प्रधानमन्त्री ओलीं वइगु वैशाख १७ गते व २७ याये धाःगु चुनाव नं जुजु ज्ञानेन्द्रं शाहं याःगु चुनाव थें जुइ धासें उगु चुनाव सफल मजुइगु दावी नं यानादिल ।

वय्कलं धयादिल, ‘पार्टीया अन्तद्र्वन्द्व ज्यंके मफयेवं संसद विघटन याःगु इतिहास दु, आः नं उगु हे इतिहास दोहरे जूगु जक खः, पार्टीया अन्तद्र्वन्द्व ज्यंके मफयेवं संसदयात त्वाकः दयेकेगु ज्या न्हापा नं जूगु खःसा आः नं उगु हे ज्या जूगु दु ।’

वय्कलं नेपालय् संसदीय व्यवस्था अफापसिद्ध जुइधुंकूगु्लिं आः प्रत्यक्ष निर्वाचित राष्ट्रपतीय शासन व्यवस्था हयेमाःगु खँय् नं बः बियादिल । वय्कलं नेपाःया राजनीतिइ पुलांगु शक्ति असफल जुइधुंकूगु खँ धासें आः न्हूगु शक्तिया आवश्यकता जूगु खँ नं धयादिल । नेपाः संसदीय व्यवस्था पूर्ण रुपं संसदीय व्यवस्था मखुगु दावी यासें पूर्ण संसदीय व्यवस्थाय् संसदया मू भूमिका दइगु खःसां नेपालय् संसदया भूमिका गौण जुयाच्वंगु खँ नं कनादिल ।

प्रधानमन्त्री ओलीया पलाः प्रतिगामी जूगु धासें वय्कलं उकियात भिंकेगु निंतिं आः देय्न्यंकं आन्दोलन यायेमाःगु खँ कँसें वय्कलं थुकिया लागिं फुक्कं राजनीतिक पार्टीत छप्पँ जुइमाःगु आवश्यकता नं कुलादिल । अथे नेतृ हिसिला यमिं आःया लडाइँ राजनीतिक लडाइँ स्वयां नं अग्रगामी व पश्चगामीया लडाइँ जुयाच्वंगु दु धासें थ्व लडाइँलय् पश्चगामीया पराजय जुइगु निश्चित दु धयादिल ।

जनता समाजवादी पार्टीं संसद विघटन विरुद्ध सतक आन्दोलन शुरु यायेधुंकूगु दुसा थ्व झ्वलय् आः मसाल जुलुस पिकायेगु नं तयारी यानाच्वंगु दु ।

सम्बन्धित बुखँ

LEAVE YOUR COMMENTS