ल्वहंहिति मर्मतय् प्राथमिकता
येँ – येँ महानगरपालिका १ नं. वडां चालु आर्थिक दँय् थःगु वडा लागा दुने च्वंगु ल्वहंहिति मर्मतयात प्राथमिकता बीगु जूगु दु । येँ मनपा १ नं. वडाय् च्वंगु प्यंगू ल्वहंहिति दुगु व दक्वं ल्वहंहितियात थ्व हे आर्थिक दँया दुने मर्मत यायेगु जानकारी वडाअध्यक्ष भरतलाल श्रेष्ठं बियादीगु दु ।
वडाअध्यक्ष श्रेष्ठं वडा नं. १ य् लिच्छवीकालीन ईया नक्साः, गै¥हीधारा, तीनधारा व हितिपुखू यानाः प्यंगू ल्वहंहिति दुगु व अज्याःगु ल्वहंहितिया अस्तित्व तना वनीगु अवस्थाय् थ्यंगु धासें चालु आर्थिक दँय् दक्वं ल्वहंहिति मर्मत यानाः अपस्तित्वय् हयेत प्राथमिकता बियागु धयादिल ।
वडाया विकास निर्माणया निंतिं धकाः चालु आर्थिक दँइ् विनियोजन जूगु स्वगू करोड बजेटं हे ल्वहंहिति मर्मत यायेगु योजना दुगु वय्कलं धयादिल । थुगु दँय् वडा नं. १ दुने लाःगु सांस्कृतिक महत्वया सम्पदा व ल्वहंहिति मर्मत यायेगु वडाअध्यक्ष श्रेष्ठं धयादिल ।
थ्व हे झ्वलय् येँ महानगरपालिकाया प्रमुख विद्यासुन्दर शाक्यं छुं ई न्ह्यः जक महानगर लागा दुनेया दक्वं वडाय् सार्वजनिक व खाली जग्गाया पहिचान यानाः उकिया संरक्षण व संवद्र्धन यायेत बियादीगु निर्देशनकथं मेमेगु वडाय् अज्याःगु थाय् मालेगु ज्या जुयाच्वंसां थःगु वडा दुने धाःसा अज्याःगु खाली जग्गा मदुगु नं वय्कलं जानकारी बियादिल ।
मनपा प्रमुख शाक्यया निर्देशन लिपा आतकया दुने वडा नं. ३ य् १५ रोपनी, वडा नं. २९ य् ९ रोपनी व वडा नं. ६ लय् १० रोपनी सार्वजनिक जग्गाया पहिचान यायेगु ज्या जुइधुंकूगु दु । पहिचान जूगु दक्वं खाली व सार्वजनिक जग्गा संरक्षण यानाः सकसिगुं पहुँच दइकथं क्यब निर्माण याइगु जुयाच्वंगु दु ।
LEAVE YOUR COMMENTS