ने. सं. ११४६ बछलाथ्व चौथी - बुंगद्यः सालिगु

लछिं हे क्वःदल प्रदेश सरकार

येँ (नेपालभाषा टाइम्स)- नागरिक उन्मुक्ति पार्टीया सांसदतय्स विश्वासया मत मबीवं सुदूरपश्चिमया मुख्यमन्त्री राजेन्द्रसिंह रावलया सरकार त्वःदःगु दु । मुख्यमन्त्री रावलं म्हिगः विश्वासया मतया नितिं तःगु प्रस्ताव अस्वीकृत जूगु खः । नाउपां पार्टीया संस्थापक अध्यक्ष रेशम चौधरीयात मत्वःतूतले सुदूरपश्चिमया सरकारयात विश्वासया मत मबीगु अडान काःगु खः ।

विश्वासया मत काये मफयाः सुइन्हुया दुने प्रदेश सरकार क्वःदःगु थ्व न्हापांगु घटना खः । संविधान कथं मुख्यमन्त्री नियुक्त जूगु लछिया दुने विश्वासया मत कायेमाः । नाउपां जेलय् लानाच्वंम्ह चौधरी लगायत न्हय्म्ह राजबन्दी त्वःतेमाःगु शर्त तःगु दु । मुख्यमन्त्री रावलं तःगु विश्वासया मतया प्रस्ताव ध्वनी मतं अस्वीकृत जूगु खः ।

एमालेया रावल माओवादी, नाउपा व राप्रपाया समर्थनय् वंगु पुस २७ गते मुख्यमन्त्री नियुक्त जूगु खः । ५३ म्ह दुजः दुगु सुदूरपश्चिम प्रदेशसभाय् माओवादीया ११, एमालेया १०, नाउपाया ७ व राप्रपाया छम्ह सांसद दु । नाउपां बैठकय् ब्वति मकायेवं बहुमतया नितिं माःगु २७ मत खाके मफुगु खः ।

थ्व स्वयां न्ह्यः सुदूरपश्चिम प्रदेशय् सभामुख ल्यज्याय् नं नाउपां ब्वति मकाःगु खः । निक्वः तक जूगु मतदानय् नाउपा तटस्थ च्वनेवं लिपा प्रम पुष्प कमल दाहाल व एमाले अध्यक्ष केपी ओलीं स्वक्वःगु चुनावय् माओवादीया भीमबहादुर भण्डारीयात सभामुख निर्वाचित याःगु खः ।

सुदूरपश्चिमय् थःगु रावल सर–कारयात मत बीगु खँय् म्हिगः नाउपा अध्यक्ष रञ्जिता श्रेष्ठ व एमाले अध्यक्ष ओली दथुइ नं येँय् वार्ता जूगु खः । तर उकी रेशम चौधरीयात त्वःतेगु खँय् ओलीं सकारात्मक लिसः मबीवं विश्वासया मत मबिउगु खः ।

सुदूरपश्चिम प्रदेशय् आः सत्ता समीकरण हिलीगु जूगु दु । रावल संविधानया धारा १६८ या उपधारा (२) कथं मुख्यमन्त्री नियुक्त जूगु खःसा आः संविधानया धारा १६८ (३) क कथं दकलय् अप्वः सिट दुगु पार्टीं सरकार गठन यायेगु लँपु चाली । थ्वकथं आः कांग्रेसं मुख्यमन्त्री दावी याइगु खनेदु । यदि उकी माओवादीया समर्थन दत धाःसा कांग्रेसया मुख्यमन्त्री वइगु सम्भावना दु । प्रदेशय् कांग्रेसयाके १९ व माओवादीयाके ११ सिट दु ।

सरकार दयेकेत २७ सिट दःसा गाः । तर माओवादीं साथ मबिल धाःसा कांग्रेसं नं सरकार गठन याये फइ मखु । संविधानया धारा १६८ या उपधारा (३) कथं गठन जूगु सरकारं विश्वासया मत कायेमफुत धाःसा हाकनं उपधारा ५ कथं प्रदेशसभाया सुं नं दुजलं प्रदेशसभाय् विश्वासया मत कयाः सरकार गठन याये फइगु अवस्था वइ । तर उम्ह मुख्यमन्त्रीं नं लछिया दुने विश्वास मत काये मफइगु अवस्था जुल धाःसा उपधारा ७ कथं उपधारा ५ अनुरुप नियुक्त जूम्ह मुख्यमन्त्रीया सिफारिसय् प्रदेश प्रमुखं प्रदेशसभा विघटन यानाः खुलाया दुने निर्वाचन जुइ कथं न्हूगु निर्वाचनया मिति क्वःछीमाःगु व्यवस्था दु ।