विश्वविद्यालययात नमूना दयेकाः क्यने ः बिजुक्छे
ख्वप – ख्वप इन्जिनियरिङ कलेज व ख्वप कलेज अफ इन्जिनियरिङ कलेजया वार्षिकोत्सव नापं निन्हुयंकंया शैक्षिक ब्वज्या जुल । ख्वप नगरपालिकापाखें संचालन जुयाच्वंगु ख्वप कलेजया झिंन्हय्क्वःगु व ख्वप कलेज अफ इन्जिनियरिङया झिक्वःगु वार्षिकोत्सवलिसें शैक्षिक ब्वज्या जूगु खः ।
वार्षिकोत्सवया झ्वलय् कलेजया विद्यार्थीतय्सं थीथी शोधपत्र नं न्ह्यब्वःगु खः । अथे हे शैक्षिक ब्वज्याया झ्वलय् ३१ गू रोबोटसहितया ब्वज्या नं याःगु खः । वार्षिकोत्वस ज्याझ्वःया मूपाहां नेपाल मजदुर किसान पार्टीया अध्यक्ष नारायणमान बिजुक्छें थःगु पार्टी नेमकिपां पार्टीया सिद्धान्त व संघर्षपाखें विचलित जुइमखु धासें थुकिया निंतिं निरन्तर रुपं न्ह्याः वनेगु जुइ धयादिल ।
लिसें वय्कलं राजनीतियात सुनानं ख्याः यायेगु विषय दयेके मजिउगु खँय् नं बः बियादिसें ल्याय्म्ह पुस्तात राजनीतिइ वःसा देय्यात बचे याये फइ धासें ल्याय्म्ह पुस्तां राजनीतिइ चिउताः मतयेगु खः धइगु जूसा देय् खतराय् लाइ धयादिल । यदि सरकारं ख्वप नगरपालिकायात विश्वविद्यालय संचालन यायेगु स्वीकृति बिल धाःसा थःपिंसं उकियात नमूना दयेका क्यना बीगु दावी यासें लबः नयेगु व कमिशनया निंतिं जक विश्वविद्यालय वा कलेज चायेकेगु धइगु गलत प्रवृत्ति खः धयादिल ।
ज्याझ्वलय् नेमकिपाया नेता नापं प्रतिनिधिसभा सदस्य प्रेम सुवालं थःपिंसं विश्वविद्यालय संचालन यायेत अनुमति बीत माग यानागु खःसां सरकारं थुकी ध्यान बियाच्वंगु धासें ख्वप नगरपालिकां संचालन यानाच्वंगु कलेजय् देय्न्यंकंया विद्यार्थीतय्सं म्हो शुल्कं उच्च गुणस्तरीय शिक्षा कायेत सफल जुयाच्वंगु धयादिल ।
ज्याझ्वलय् प्रदेश नं. ३ या सांसद सुरेन्द्रराज गोसाइ, ख्वप नगरपालिकाया प्रमुख सुनील प्रजापति, इन्जिनियरिङ अध्ययन संस्थानया डीन प्रा. डा. त्रिरत्न वज्राचार्य, इञ्जिनीयरिङ अध्ययन संस्थानया प्रा. डा. प्रेमनाथ मास्के, ख्वप इञ्जिनीयरिङ कलेजया प्राचार्य सुजन माकः व ख्वप कलेज अफ इन्जिनियरिङ कलेजया प्राचार्य सुनिल दुवाल लगायतं कलेजं बिया वयाच्वंगु गुणस्तरी शिक्षा नापं कलेजं यानाच्वंगु प्रगतियात कयाः चर्चा यानादीगु खः ।
LEAVE YOUR COMMENTS