शिक्षा आयोगया रिपोर्ट आयोग थःपिंसं हे बिल
येँ (नेपालभाषा टाइम्स) – उच्चस्तरीय राष्ट्रिय शिक्षा आयोगया प्रतिवेदन म्हिगः सार्वजनिक याःगु दु । सरकारं वंगु झिंगुला न्ह्यवंनिसें सुचुकातःगु उगु प्रतिवेदन वंगु शुक्रवाः दरबार हाइस्कुलय् छगू ज्याझ्वः यासें आयोगया झिंस्वम्ह दुजःपिंसं सार्वजनिक याःगु खः ।
आयोगया दुजःपिं श्यामकुमार श्रेष्ष्ठ, विमलकुमार फुयाँल, प्रा. डा. रामस्वार्थ राय. डा. कुष्णप्रसाद पौडेल, प्रा.डा. टंकनाथ शर्मा, चक्रमान विश्वकर्मा, डा. सुशन आचार्य, प्रा.डा. सुजनबाबु मरहठ्ठा, बाबुराम थापा, लक्ष्मण शर्मा, डा. सदानन्द कँडेल, प्रा.डा. विद्यानाथ कोइराला व प्रा.डा. मीनबहादुर बिष्ट उगु प्रतिवेदन मंकाः कथं सार्वजनिक यानादीगु खः ।
वय्कःपिंसं उगु प्रतिवेदन गोप्य तयेमाःगु कारण मदुगु धासें प्रतिवेदन सार्वजनिक यानादीगु खः । वय्कःपिंसं मंकाः कथं हस्ताक्षर यासें सार्वजनिक याःगु प्रतिवेदनय् धयातःगु दु, ‘थुकियात जनसमक्ष सार्वजनिक मयायेगु सार्वभौम जनताप्रतिया जवाफदेहीहिनता व संविधानं प्रदत्त सूचनाया हकया हनन खः, आः तक गुगुं नं शिक्षा आयोगया प्रतिवेदन थुकथं सुचुकातःगु इतिहास मदु ।’
आयोगया दुजः प्रा.डा. विद्यानाथ कोइरालां प्रचार प्रसार यायेगु आज्जु कथं हे प्रतिवेदन सार्वजनिक यानागु व उकियात कयाः व्यापक सहलह जुइमाःगु खँ धयादीगु दु। वय्कलं धयादी, ‘आयोगं तयार याःगु प्रतिवेदन प्रधानमन्त्री लःल्हायेधुनागु खः तर सरकारं सार्वजनिक यायेमफुत, स्कुलनिसें विश्व विद्यालय तह तक सुधार यायेफइ धकाः प्रतिवेदन दयेकूगु खः, थ्व प्रतिवेदनय् सरकार सहमत जुइ नं फु, मजुइ नं फु, हुबहु कार्यान्वयन यायेमाः धइगु नं मदु ।’
शिक्षा आयोगया प्रतिवेदन सार्वजनिक जुइवं सरकारं प्रतिवेदन सार्वजनिक याःगु संस्थायात कारबाही यायेगु ख्याच्वः बिउगु दु। सरकारया लोगो दुरुपयोग याःगु धासें शिक्षा मन्त्रालयया प्रवक्ता लिसे सहसचिव दीपक शर्मा म्हिगः छगू सुचं जारी यासें उगु ख्याच्वः बिउगु खः । लुमंकेबहजू शिक्षा आयोगया अध्यक्ष शिक्षा मन्त्री गिरिराजमणि पोखरेल खः ।
LEAVE YOUR COMMENTS