‘नेपालय् चीन-भारतय् छ्यलीगु खोप हयेमाः’

येँ (नेपालभाषा टाइम्स) – सरकारं कोरोनाविरुद्धया खोप हयेगु निंतिं तयारी न्ह्याकूगु खँ धाःगु दु । स्वास्थ्य तथा जनसंख्या मन्त्रालयं खोप हयेगु निसें खोप बीगु तकया तयारीया निंतिं च्यागू उपसमिति दयेकाः ज्या न्ह्याकेधुनागु खँ धाःगु दु । मन्त्रालयया बालबालिका तथा खोप शाखाया प्रमुख डा. झलक शर्मां राससलिसे खँ ल्हासें विश्व स्वास्थ्य संगठन (डब्ल्यूएचओ), गाभी व सेपी नांया स्वंगू संगठनया ‘कोभ्याक्स सुविधा’ अन्तर्गत नेपालय् खोप हयेगु निंतिं ज्या न्ह्याकागु खँ धयादीगु दु । तर वय्कलं आःतक खोप परीक्षणया झ्वलय् हे दुगुलिं छु खोप हयेगु धाःसा नं क्वःमजिउनिगु खँ धयादीगु दु ।

डा. शर्मां आः परीक्षणया झ्वलय् प्रभावकारी लिच्वः वल धयाच्वंगु अमेरिकाया फाइजर व बायोटेक कम्पनी, मोर्डना, बेलायतया अक्सफोर्डं, रुसया ग्यामेलियां दयेकाच्वंगु खोप मध्ये हे छगू वइगु खँ धयादीगु दु । वय्कःया कथं खोप उत्पादन याइगु देशय् दर्ता जुइधुंकाः थ्व खोप डब्ल्यूएचओय् दर्ता जुइ, व धुंकाः नेपाःया औषधि व्यवस्था विभागय् दर्ता यायेगु जुइ । थ्वहे दथुइ विज्ञतय्सं भारत व चीनं गज्याःगु खोप हइ, व स्वयाः हे नेपालय् अज्याःगु हे खोप हःसा बांलाइगु खँ धाःगु दु। नेपाःया जनताया रहन सहन नं भारत व चीनय् च्वनीपिनि रहनसहन लिसे हे ज्वःलाःगुलिं अन हइगु खोप हे नेपाःया निंतिं बांलाइगु खँ विज्ञतय्सं धाःगु खः ।

युरोप व अमेरिकाय् छ्यलीगु खोप स्वयां चीन व भारतय् छ्यलीगु खोप हे नेपाःया निंतिं दीर्घकालिन रुपं नं बांलाइगु जूगुलिं भारत व चीनलिसे खोप हयेगु सम्बन्धय् नेपालं गम्भीर रुपं खँल्हाबल्हा न्ह्याकेमाःगु खँ नं विज्ञतय्सं धाःगु दु । इपिडिमियोलोजी तथा रोग नियन्त्रण महाशाखाया पुलांम्ह निर्दे शक व कोरोना खोप व्यवस्थापन समितिया दुजः डा. जीडी ठाकुरं धयादीगु दु, ‘नेपालीतय् जिन, रहनसहन, नयेत्वने, वातावरण, आर्थिक अवस्था आदि फुक्कं चीन व भारतलिसे ज्वःलाःगुलिं चीन व भारतय् छ्यलीगु खोप हे नेपालं नं ध्यान बिउसां बांलाइ ।’

अथेहे कोभ्याक्स सुविधा पाखें सहुलितय भावं वइगु खोप फुक्क नेपाःमितय्गु निंतिं मगाइगु जूगुलिं नं थप खोप हयेगु निंतिं चीन व भारत लिसे हे संवाद न्ह्याकेमाःगु वय्कःपिनि बिचाः दु। कोभ्याक्स सुविधा कथं नेपाःया २० प्रतिशत जनसंख्यायात गाक्क जक खोप वइ । थ्व नं छक्वलं मवसे चरणवद्ध रुपं वइ ।

सम्बन्धित बुखँ

LEAVE YOUR COMMENTS