देगः छगः दनेत ४७ ताजिया अप्पा

यल-थनया लाय्कू लागाया छगः देगः जिर्णोद्वारय् पीन्हय्ताजि न्हूगु अप्पा छ्यलीगु जूगु दु । थनया मंगलबजास्थित लाय्कुलिइ च्वंगु ज्वाला नर्सिंह देगः पीन्हय्ताजि थीथीकथंया अप्पा छ्यलाः जिर्णोद्वार यायेत्यंगु खः ।

जिर्णोद्वारया निंतिं उगु देगःया बुर्जा थुंगु इलय् जक १०८ ताजिया थीथीकथंया अप्पा लुया वःगु खः । बुर्जाया क्वय्या ब्व (बीम लेभल) थुंगु इलय् अन हे जक पीन्हय्ताजिया अप्पा छ्यलेमाःगु खनेदुु इन्जिनियर प्रणाम होरां जानकारी बियादीगु दु । देगः जिर्णोद्वारया निंतिं थुंगु इलय् पिहां वःगु पुलांगु अप्पा छ्यलेगु अवस्थाय् मदुगुलिं न्हूगु हे अप्पा दयेकेमाःगु जूगु दु । देगलय् लुया वःगु थीथी कथंया अप्पामध्ये ४७ ताजिया न्हूगु हे अप्पा दयेकेमाःगु जूगुलिं दक्वं छपा छपा अप्पाया नमूना लिकयाः दयेके बीगु नं इन्जिनियर होरां कनादिल ।

देगलय् छ्यलीगु अप्पा घरायसी प्रयोजनया निंतिं छ्यलीगु अप्पा स्वयां गाक्कं पाःगु व अप्पाया साइज नं चीपा जूगुलिं न्हूगु ताःचा दयेकाः अप्पा दयेके बीमाःगु नं वय्कलं धयादिल । जीर्ण देगः दनेत दक्वं भाग थुंगु इलय् देगःया करिब स्वब्वय् छब्व न्हूकथं हे दयेकेमाःगु अनुमान याःगु दु । देगलय् न्हापा छ्यलातःगु सिँ, ल्वहं लगायत मेमेगु हलंज्वलं गुलितक हाकनं प्रयोग यायेगु जिउ वा मजिउ धइगु खँ देगः थुने धुंकाः जक सी दइगु जूगु दु । देगः दनेगु निंतिं स्काफ फोल्डिङया ज्या न्ह्यायेधुंकूगु दुसा बुर्जाया भाग नं थुनाः अप्पा तयार जुयाः वलकि निला स्वलाया दुने देगः दनेगु ज्या शुरु जुइगु काठमाडौं भ्याली प्रिजर्भेसन ट्रष्टया निर्देशक डा. रोहितकमार रंजितकारं जानकारी बियादिल । यल महानगरपालिकां देगः जिर्णोद्वारया निंतिं २० गू लाख तका उपलब्ध याकेधुंकूगु दु ।