ने. सं. ११४६ अनलागा अष्टमी -

पाँचथरय् ससःअबु–जिलाजं निगू परिवारया गुम्हेसिया विभत्स हत्या

येँ – पाँचथरया मिक्लाजुङ, आरुबोटे धाःथासय् निगू परिवारया गुम्हसिया हत्या जूगु दु । ख्वालय् त्वपुना वःपिं छथ्वः हत्यारातय्सं ससःअबु व जिलाजं निम्हेसियां परिवार हे सखाप याये कथं थ्व हत्याकाण्ड याःगु खः । थुगु हत्याकाण्डय् बचे जूम्ह झिंनिदँ दुम्ह मचा सीता खुजुमं ख्वाःपाः पुनावःपिं छथ्वः मनूतय्सं खुकुरी, तलवारं अन्धाधुन्ध पालाः सकसियागुं हत्या याःगु खँ धाःगु दु । सीता नं उमिगु आक्रमणय् लाःगु खःसा व अनं बचे जुयाः वयेत ताःलाःगु खः । वयात आः प्रहरीं उपचारया निंतिं फिदिमय् यंकूगु दु ।

थुपिं हत्यारातय्सं सोमवाः चान्हय् ससःअबुम्ह बमबहादुर फियाक व जिलाजंम्ह धनराज शर्मोया छेँय् आक्रमण याःगु खः । ससःअबु व जिलाजंया छेँ थ्यंमथ्यं डेढकिलामिटर तापाक लाः । छथाय् आक्रमण याना वयेधुंकाः मेगु छेँय् वनाः आक्रमण याःवंगु खनेदुगु खँ अनुसन्धानकर्तातय्सं धाःगु दु । तर न्हापां गुगु छेँय् आक्रमण याःगु धयागु सीमदुनि धाःगु दु ।

हत्यारातय्सं ससःअबुम्ह बमबहादुर फियाक (७४ दँ), वया कलाः, जस्मिता फियाक (३६ दँ), मनकुमारी फियाक (२६ दँ) व जिलाजं धनराज शर्मा (४१ दँ), इक्सा शेर्मा (खुदँ), योवना शेर्मा (१३ दँ), मुना शेर्मा (च्यादँ), आशिका खजुम लिम्बु (१२दँ) याना स्यानाबिउगु खः । सीता खुजुमयात नं स्यायेत स्वःगु खःसां व बिसिउँ वयेत ताःलाःगुलिं वया ल्हाः त्वःधूगु दु ।

वंगु चान्हय् जूगु थ्व हत्याकाण्डया जानकारी जःलाखःलातय्सं थौं सुथय् जक सिउगु खः । जःलाखःलाः सिइधुंकाः प्रहरी अन थ्यंकःवंगु खः । घटना जूगु थाय् पाँचथरया सदरमुकाम फिदिमं ६५ किलोमिटर तापाक लाःगु थाय् खः ।
प्रहरी निखा अलग अलग छेँय् च्वनीपिं थःथितिपिंत स्याःगु कारण पारिवारिक ल्वापु हे जुइमाःगु अनुमान याःगु दु । स्थानीयतय्सं ससःअबु व जिलाजंम्हेसिया वंश हे नाश यायेकथं थ्व हत्याकाण्ड जूगु खँ धाःगु दु ।
प्रहरीं थ्व हत्याकाण्डया अनुसन्धानया जिम्मा केन्द्रीय अनुसन्धान ब्युरो (सिआइबी)यात बिउगु दु । सिइआबीया एसपी उमाप्रसाद चतुर्वेदीया नेतृत्वय् अनुसन्धान पुचः घटनास्थलपाखे वनेधुंकूगु दु ।