येँय् जुजुवादी र्‍याली

येँ (नेपालभाषा टाइम्स) – गणतन्त्र व धर्म निरपेक्षताया विरोध यासें म्हिगः येँय् नं प्रदर्शन यात । वंगु छुं ई न्ह्यवंनिसें स्वनिगलं पिने जिल्लाय् प्रदर्शन याना वयाच्वंपिं थ्व जुजुवादीतय्सं म्हिगः धाःसा राजधानी येँय् हे प्रदर्शन याःगु खः । उमिसं येँय् ५० हजार मनू क्वकयाः प्रदर्शन यायेगु धाःसा र्‍यालीइ उलि मनू धाःसा वःगु खने मन्त । र्‍यालीइ वःपिं सकसितं नेपाःया राष्ट्रिय ध्वाँय् ब्वयेकाः गणतन्त्र व धर्म निरपेक्षतायात वांछ्वयाः राजतन्त्र व हिन्दू राष्ट्र घोषणा यायेमाः धकाः नारा थ्वयेका वःगु खः । नेपाःया संविधानय् हे गणतन्त्र व धर्म निरपेक्ष राज्य जुइ धकाः न्ह्यथनातःगु दु। तर जुजुवादीतय्सं संविधानया हे विरोध यानाः प्रदर्शन याःसां प्रहरी व प्रशासनं धाःसा उमित छुं मयासे प्रदर्शन याके बिउगु खः ।