
बलिउड फिल्म उद्योगय् सफलता लिपा थौंकन्हय् हलिउडय् नं उलि हे सफलता प्राप्त यायेगु नापं उखेपाखे हे न्ह्यइपुका च्वंम्ह नायिका खः प्रियंका चोपडा । हलिउडय् छगू लिपा मेगु सफलताया त्वाथः गया वनाच्वंम्ह प्रियंकां आः वयाः थःगु पृष्ठभूमि अर्थात बलिउडयात ल्वःमंकूगु खः ला धइगु आशंका याना हयाच्वंगु दु । छाय्कि थ्व इलय् प्रियका बलिउडय् हाकनं लिहां वयेगु पलेसा हलिउडय् वयागु निंतिं सकतां जुया बिउगु दु ।
थौंकन्हय् हलिउडय् हे व्यस्त व मस्त जुयाच्वंम्ह प्रियंकां लिपांगु हलिउडया छगू तःधंगु संकिपा ल्हातय् लाकेत सफल जुगु दु । थ्व सफलता लिपा प्रियंकाः बलिउडया ततःधंगु व चर्चित ब्यानरया संकिपाया ‘अफर’यात तकं ‘रिजेक्ट’ याःगु धइगु खँ बलिउडय् चर्चा जुयाच्वंगु दु । खतुं न्हापां ला थः प्रेमी निक जान्सनापं इहिपाया तयारी यायेमाःगुलिं फिल्म त्वःतूगु धाःसां लिपा व खँ अबलय् असत्य सावित जुल, गबले प्रियंकां क्रिस प्रेटया मुख्य भूमिका दुगु हलिउड फिल्म ‘काउब्वाइ निन्जा बाइकिंग’ म्हितीगु खँ पिहां वल ।
वयां लिपा प्रियंकां भेट्रान निर्देशक संजय लिला भंसालीया फिल्म नं त्वःतूगु धइगु समाचार पिहां वःगु दु । प्रियंकाया हे प्रमुख भूमिका दुगु धयातःगु संकिपाय् म्हितेत तयार जुइधुंकाः लिपा हलिउडया संकिपा ल्हातय् लायेवं उकियात नं अस्वीकार याःगु चर्चा जुयाच्वंगु दु ।
LEAVE YOUR COMMENTS