ने. सं. ११४४ कछलागा षष्ठी -

जुजुया पक्षय् बागू लाख मनू क्वकाइगु

येँ (नेपालभाषा टाइम्स) – देशय् छखे कोरोना महामारी तच्वया वनाच्वंगु व मेखे सत्तारुढ पार्टी दुने ल्वापु तब्या जुजुं वनाच्वंगु इलय् लाकाः जुजुवादीतय्सं धाःसा न्हिंन्हिं हे देय्या थीथी थासय् र्‍याली व सभा थेंज्याःगु ज्याझ्वः याना हयाच्वंगु दु ।

म्हिगः जुजुवादीतय्सं येँया वानेश्वर लागाय् तःधंगु र्‍याली पिकाःगु खः । उमिसं पिकाःगु र्‍यालीं यानाः सतकय् ट्राफिक जाम समेत जूगु खः । र्‍याली पिकाःपिंसं नेपाःया ध्वाँय् ब्वयेकाः ‘राजा आऊ, देश बचाऊ’ धकाः नारा थ्वयेकाः वःगु खः । जुजुवादीतय्सं म्हिगः हे नेपालगंजय् नं तःधंगु मोटरसाइकल र्‍याली पिकाःगु दु । अन नं उमिसं नेपाःया ध्वाँय् ब्वयेकाः ‘राजा आऊ, देश बचाऊ’ नारा थ्वयेकूगु खः ।

देशय् कोरोना संक्रमण अप्वया वनाच्वंगु इलय् तकं उकिया चिउताः मतसे स्वास्थ्य मापदण्डयात वेवास्ता यासें जुजुवादीतय्सं थज्याःगु र्‍याली आयोजना याना वयाच्वंगु दु । जुजुवादीतय्सं आः याकनं हे राजधानी येँय् ५० हजार मनू क्वकयाः जुजुया पक्षय् तःधंगु प्रदर्शनी यायेगु तयारी यानाच्वंगु खँ नं सीदुगु दु । उकिया लागिं देय्या थीथी जिल्लां मनूत येँय् हयेगु तयारी यानाच्वंगु खँ नं सीदुगु दु । जुजुया पक्षय् तःधंगु र्‍याली पिकयाः गणतन्त्रवादीतय्त हाथ्या बीगु उमिगु तयारी दुगु खँ धाःगु दु ।

जुजुवादीतय्सं राजतन्त्र नापनापं हिन्दू राष्ट्र, सनातन धर्मया संरक्षण व देय्या संस्कृति रक्षा जुइमाः धइगु माग नं याना वयाच्वंगु दु । राजतन्त्र पलिस्था जुइवं देय्यात हानं हिन्दू राज्य हे दयेकेमाः धइगु नं उमिगु माग जुयाच्वंगु दु। नेपाःयात धर्म निरपेक्ष राज्य दयेकेगु खःसा जनमत संग्रह यायेमाःगु नं उमिउगु माग दु ।