न्हाप हे लाःगु तायेका : शशीकला मानन्धर

किपू नगरपालिकाया ग्वसालय् नकतिनि क्वचाः नेपालभाषा चिहा संकिपा कासा नकतिनि क्वचाल । थुगु चिहा संकिपा कासाय् डेल्टा मल्टिमिडिया प्रोडक्सनया न्ह्यब्वया ‘साःगः’ न्हाप, नेवाः युट्युबया न्ह्यब्वया ‘आजुद्यः’ ल्यू, शशीकला मानन्धरया न्ह्यब्वयाः ‘लाखेपाः’ लियांल्यू व फोकस पिक्चर्सया न्ह्यब्वया ‘न्हयेका सिँ’यात हःपाः सिरपाः लात । चिहा संकिपा ‘लाखेपाः’या निर्माता व कलाकार शशीकला मानन्धर लिसे उदेन न्हूसाय्मिं सिरपाः त्याकूगु चिहा संकिपायात कयाः यानादीगु खँल्हाबल्हा :

विषयवस्तुइ केन्द्रीत जुयाः बाखं च्वये अःपु कि थाकु ?
थम्हं सिउगु विषयवस्तु जूसा भचा अःपु मखुसा थाकु। उकिसनं संकिपा व चिहा संकिपाया निंतिं बाखं जक च्वयां मगाः । गथे संकिपाया निंतिं स्क्रिप्ट च्वइ, चिहा संकिपाया निंतिं नं स्क्रिप्ट च्वयेमाः । बाखं च्वये अःपु तर संकिपाया स्क्रिप्ट च्वये थाकु। मेहनत यक्व माः । यक्व खँय् ध्यान बीमाः ।

सत्य घटना वा किम्वदन्तिइ छुकी आधारित चिहा संकिपा खः ?
न्यना तयाकथं न्यासः दँ न्ह्यःया छपु लोकबाखं खः ‘लाखे पाः’ । च्यादँ ति न्ह्यः किपुलिइ फेस्टिभल न्यायेकूबलय् जि चाःहिउ वनागु। अबलय् किपू देय् या सांस्कृतिक पक्ष, धार्मिक पक्ष, ऐतिहासिक पक्ष बारे आपालं ज्ञान, जानकारी काये खन । उकीमध्ये जितः छथाय् ‘लाखेपाः’ धकाः च्वनाच्वंम्ह छम्ह मनू खनाः अजू चाल । व दृश्य जिगु मनय् थिल । अथवा धाये छगूकथं बाखनं नुगलय् थिल । अबलय् निसें ‘लाखेपाः’ जिगु नुगलय् च्वनाच्वंगु खः । किपू नगरपालिकानाप स्वापू दुगु बाखंया लिधंसाय् चिहा संकिपा कासा ग्वसाः ग्वःबलय् जिं व हे ‘लाखेपाः’ लोकबाखंया लिधंसा कयाः स्क्रिप्ट च्वयागु खः ।

स्वकुमिपिंसं तसकं बांलाः धाःगु संकिपा लियांलिउ लात छु धयादी ?
ब्वति काःगु न्हय्गू चिहा संकिपा स्वयेधुंकाः बाखंया स्क्रिप्टया ल्याखं ‘लाखेपाः’ हे बांलाःताःगु खः । थ्व जिगु नुगःखँ जुल । उकिसनं कासाय् दुथ्याःगु न्हय्गू संकिपा स्वयेधुंकाः दबुलिइ किपूया मेयर व मेपिं पाहांपिंसं नुगःखँ तयाच्वनादीगु इलय् यक्वसिनं हे जिगु लिक्क वयाः संकिपा बांलाः छितः भिंतुना धाः वल । उकीमध्ये छम्ह पत्रकार, नां नं काये । नेपालभाषा टाइम्सया सम्पादक सुरेशकिरण मानन्धर । सुरेशकिरणं हतपतिं बांलाः धाइमखु। धाथें बांलाःगु खःसा जक ‘बांलाः’ धाइम्ह । जितः सुरेश किरणं नं संकिपा बांलाः धाःवल । मेपिंसं धाःगु स्वयां दकलय् जितः सुरेश किरणं ‘बांलाः’ धाःबलय् ।।।लाखेपाः’ हे न्हाप लाइ धइगु जिं मतिइ तयाः आश याये लात । लिच्वः न्यंकूबलय् लियांलिउ लात । स्वकुमिपिंसं जक बांलाः धयां मजिउ । जजपिनिगु मिखां नं बांलाः खंकेमाः । कमसेकम लियांलिउ सां लात धकाः मन तया । लिपा हल पिने किपूयापिंसं गुगु प्रतिक्रिया बिल उकियात जिं लियांलिउ मखु न्हाप हे त्याका बराबर तायेकागु दु ।

कमि कमजोरी वा मगाः मचाः छु दु थे च्वं ?
जिं छुं कमिकमजोरी दुगु थें मतायेका । निर्देशक आर्यम नकःमिया निर्देशन च्वन्ह्याः, सोहन मानन्धरया छाँयाकन/सम्पादन नं च्वन्ह्याः । सकलें कलाकारं उतिकं बांलाक मेहनत व अभिनय याःगु दु। जिगु अभिनयया नं तारिफ जूगु दु। बरु संकिपाय् मखु, व्यवस्थापन पक्षया कमि कमजोरी दुगु जिं तायेका । गुगु उद्देश्यं थ्व संकिपा दयेकादिल, व गुलितक पूवंकेत सफल जूगु तायेकादिया किपू देय् व अनया जनताया रक्षा यायेत इन्द्रायणी मातां भूमिका म्हितूगु बाखं ‘लाखेपा’ जितः यःथें सकसितं यइ धइगु मती तयागु खः । इन्द्रायणी माताया मू भूमिकाय् जि थः हे म्हितागु खः । संकिपाया निर्माण नं जि थम्हं हे यानागु खः । निर्देशन याये मफुगुलिं थुकिया भाला आर्यम नकःमियात बियागु खः । न्हाचः धया थें स्वकुमिपिंसं बांलाः धाःगु व वय्कःपिंसं फंफं भिंतुना जिगु म्हिचाये तया बिउगुलिं हे जिं सफल जूगु तायेका ।

किपूया सांस्कृतिक पक्ष न्ह्यब्वयेत गुलितक सफल जू थें च्वं ?
स्क्रिप्ट च्वयेत यक्व मेहनत यानागु दु । अनुसन्धान व न्यनेकने नं यानागु दु। शुटिब नं किपूया थीथी थासय् यानागु। संकिपाय् आवश्यककथं किपूया जुजु, मन्त्री, सिपाही, जनता, लाखे, म्येय् (जनावर) नं पात्रया रुपय् दुथ्याकाः १५ मिनेट दुने न्ह्यब्वयेगु कुतः यानागु दु। थुलि यायेधुंकाः किपूया सांस्कृतिक पक्षयात न्ह्यब्वयेत गुलि सफल जुल धकाः किपूया स्वकुमिपिंत नं न्यनेमानि ।

ईया परिबन्धं संकिपा दयेकाबलय् पाःगु छुं दुला ?
१५ मिनेटया जक संकिपा दयेकेमाःगु शुटिब यानाबलय् १७ मिनेट दः वल । छुं कलाकारया संवाद व दृश्य लिकायेमाल । थ्व भचा सुख मदुगु खँ जुल ।

सम्बन्धित बुखँ

LEAVE YOUR COMMENTS