ने. सं. ११४४ कछलागा सप्तमी -

वनस्पतिया नेवाः नां व वैज्ञानिक नांया आधार

नेवाः नां छाय् माल ?
नेवाः भासं नं वनस्पतिया यक्व नां दु । तर नां लुमंपिं यक्व म्हो जुइ धुंकल । वनस्पतिया नेवाः नां थाकु हँ, लुमंके नं मफुत हँ । नापं नेवाः नांया अर्थ नं मथू हँ, ब्वनाः नं थुइकेत माःगु च्वसूत छुं मदु हँ । सुथय् बहनी नयेगु जा, केँ, ल्वसा वनस्पतिं हे वइगु खः । न्हिनय् नयेगु बजि, गुन्दु्र, लाभा ल्वसा नं वनस्पति हे । सगं बिइत माःगु अय्लाः, ब्याहा याइबलय् छुइत माःगु स्वां, गनेद्यःयात यःगु गँुतुसिघाँय् व महाद्यःयात छाइगु धतुरस्वां, नापं किजापुजा याइबलय् किजाया आयू ताहाकः जुइमा धकाः ततां किजायात क्वखायेकिगु ग्वय्स्वांमा, अले इहि याइबलय् माःगु ब्याः नं वनस्पति हे खः । अले झीत उसाँय् मदइबलय् नकीगु वासः नं अप्वः यानाः वनस्पति हे खः । वनस्पति झीसं म्हसिकेमाः, म्हसिकेत नां माः । नां मंतकि खँल्हाबल्हा याये मछिनि । नेवाः नांया नापं झीसं वैज्ञानिक नां नं सिइकेमा । वैज्ञानिक नां सिलकि संसारय् व वनस्पतिया महत्व सिइके दइ, मेगु भासं नं नां सिइ । ज्ञां काये फइ । थ्व च्वसुइ नेवाः व वैज्ञानिक नां गुकथं तयातःगु दु, अर्थ छु धकाः सिइकेगु कुतः याये ।

वनस्पतिया नां मुंकेगु ज्या
नेवाःभासं वनस्पतिया नां गुकथं छुनातःगु दु धकाः सिइकेत निर्मला जोशी व सुन्दर कृष्ण जोशीजुपिनिगु नेवाः नखःचखः व संस्कारय् वनस्पति, ज्यापु पञ्चजुयागु सि व पुया नेवाः नां व केशव श्रेष्ठजुयागु डिक्शनरी अफ नेपालीज ल्पान्ट नेमस् थीथी सफुत व च्वसुत संकलन यानाः नेवाः नां मुना, वैज्ञानिक नां नं मुना । पासापिंके फोनं न्यनेगु याना, फेसबुकं नं नां मुनेगु ज्या याना । पासापिं नापलाइबलय् नांया अर्थ थुइकेगु कुतः नं याना ।

वनस्पतिया नां छुनातःगु आधार
मुंका तयागु वनस्पतिया नां अध्ययन याना । नेवाः भासं व वैज्ञानिक भासं वनस्पतिया नां छु बहः कयाः दयेका तइ धकाः वाला स्वयेगु याना । मेमेगु भासं थें तुं नेवाः भासं व वैज्ञानिक भासं नं थीथी आधार गथेकि स्वभाव, आकारप्रकार, गन्ध, रस, रंग, साइज, पुजापाठ, तुलना, बासस्थान आदि बःकयाः नां तयाः तःगु खनेदु ।

नेवाः नां व वैज्ञानिक नां थीथी कथं तयातःगु खनेदु । नेवाः नां व वैज्ञानिक नां तयेगु आधार अथे अथेहे खः । नेवाः नांया लिउने अप्वः याना सिमा, स्वां, घाँय् वःगु खनेदु । वैज्ञानिक नां निगू शब्द मिलय् याना दयेका तइ । न्हापागु खँग्वःयात जिनस (न्भलगक) धाइ । ल्यूने यागु शब्दयात स्पेसिस (क्उभअष्भक) धाइ । जिनसयात जाति अलय् स्पेसिसयात प्रजाति धाइ । नेवाः नां व वैज्ञानिक नांनं अर्थ कनाच्वनी, वनस्पतिया स्वभाव, बास्ना, रंग, गन्ध, प्रयोग, सवाः इत्यादि धयाच्वनी । थुकथं झीगु भासं नं वनस्पतिया नां थःंगुहे पहः वयेक तयातःगु दु, छेला च्वंगु दु । झीसं नेवाः नांयागु वैज्ञानिक नां सिलकि झीसं व वैज्ञानिक नां गुगलय् टाइपयाना व वनस्पतियागु किपा स्वयाः म्हसीके ज्यू, व वनस्पति हलिमय् गनगन दु धका सिइके ज्यू, व वनस्पतियागु तजिलजि नं थुइके ज्यू ।